A chaschun da sia radunanza plenara ha la Conferenza da las regenzas dals chantuns alpins tschernì la cussegliera guvernativa, Carmelia Maissen sco nova presidenta. Ella suonda al cusseglier guvernativ da Glaruna Kaspar Becker ch'ha presidià la conferenza durant ils ultims dus onns, hai num en ina communicaziun.
Mia incumbensa è da manar las sesidas. Jau sun però era la fatscha da la conferenza anoravers.
La Conferenza da las regenzas dals chantuns alpins è vegnida fundada il 1981. Otg chantuns fan part da quella: Uri, Sursilvania, Sutsilvania, Glaruna, Appenzell Dadens, Grischun, Tessin e Vallais. La finamira è da represchentar ils interess specifics da las muntognas tant en Svizra sco er en l’exteriur. I dettia differentas sfidas che vegnian a fatschnetar la Conferenza da las regenzas dals chantuns alpins ils proxims onns, ha ditg Maissen envers RTR:
In grond tema è la producziun d'energia, la midada dal sistem da la producziun d'energia, ma era la planisaziun dal territori e natiralmain il management dal luf. En connex cun il luf saja la finamira da cuntanscher ina coexistenza tranter luf, uman ed agricultura.
Carmelia Maissen fa part dapi il 2023 da la regenza dal chantun Grischun ed è dapi lura scheffa dal Departament d'infrastructura, energia e mobilitad. Avant è ella stada presidenta communala da la vischnanca da Glion dal 2018 – 2020 ed a medem temp deputada en il Cussegl grond dal Grischun. Carmelia Maissen è architecta ed ha doctorà davart il tema «Svilup dals abitadis en il Grischun durant il temp suenter la guerra». Ella è commembra da l'Allianza dal Center dal chantun Grischun.