La construcziun d'arschiglia tutga tar las pli veglias metodas da construcziun insumma. La popularitad d'arschiglia sco material da construcziun saja creschida massivamain ils ultims onns. Quest onn hajan ins per l'emprima giada realisà cun success la scolaziun per construcziun d'arschiglia ed or da quella saja l'idea per il simposi naschida, di Margit Geiger, ch'è docenta a la Scola spezialisada superiura da la Svizra Sid orientala a Cuira e – sco ella sa numna sezza – activista d'arschiglia. Durant dus dis hai dà referats da spezialists e spezialistas internaziunalas, discussiuns da podi e sco punct da finiziun l'excursiun tar quatter objects da pionier da construcziun d'arschiglia. Sper Grabs, Buchs e Panaduz er a Maton en Val Schons.
«Office Haratori» a Maton
A Maton bain a mez la vischnanca han ins pudì inspectar l'«Office Haratori» – ina stalla transfurmada sco plazza da lavur e spazi da viver per il biro d’architectura Haratori da Turitg. Tar l'anteriura stalla vesa ins d'ordvart tras paraids stuppadas cun arschiglia.
L'idea saja stada da bajegiar persistent ed ecologic e da mantegnair la substanza da lain veglia e quai senza bajegiar ina «chasa en la chasa». Uschia sajan ils architects la fin finala sa decidids da bajegiar ina part cun arschiglia. In project da pionier, tar il qual alura er gist l'entir persunal dal biro Haratori a Turitg ha gidà activamain.
Material da construcziun cun futur
Arschiglia sco material da construcziun stoppia sfurzadamain avair in futur, di Doris Müller da la cuminanza d'interess da construcziun d'arschiglia. Cun la crisa dal clima actuala sajan ins sfurzà d'utilisar material da construcziun ecologic e persistent. In sentia er l'interess, l’associaziun professiunala da construcziun d'arschiglia haja entant bunamain 100 commembers e commembras. L'interess saja grond da tuttas varts e quai saja legraivel. Ussa stoppia ins guardar da scolar las persunas dal fatg.
Facit positiv
L'interess per la construcziun d'arschiglia haja ins er sentì durant ils trais dis dal simposi. Il facit da l’«activista d'arschiglia» ed inizianta Margit Geiger è positiv. Els sajan fitg cuntents ed ils resuns sajan stads positivs. D'ina persuna che saja gia da ditg en la scena da construcziun d'arschiglia haja ella survegnì il resun che l’occurrenza saja stada famigliara e professiunala, quai saja il pli bel cumpliment ch'ella haja pudì survegnir. En media hajan 80 persunas per di fatg part da l'emprim simposi svizzer da construcziun d'arschiglia a Cuira. Sch'i vegnia en il futur puspè a dar ina tala occurrenza n'ha l'inizianta dentant betg pudì dir. Mo il futur da la construcziun d'arschiglia pudess en mintga cas esser empermettent.
Or da l'archiv
