Siglir tar il cuntegn

Header

audio
Ils gronds rabats suenter Nadal – quai na pertutga betg tut ils products
Or da Actualitad dals 09.01.2024. Maletg: Keystone
laschar ir. Durada: 4 minutas 20 Secundas.
cuntegn

Consum Cumenzan il schaner propi ils gronds rabats?

Sch'ins va durant quels dis tras las butias è la probabilitad gronda ch'ins inscuntra vendidras e vendiders ch'èn fatschentads cun «decorar» ils pli differents products cun tatgaders d'acziun e rabat. Fissi damai stà meglier – u meglier per la bursa – da spetgar cun cumprar reglas da Nadal enfin il schaner u da far las cumpras per Nadal 2024 giu ussa? E co sa midan ils pretschs en butia insumma durant l'onn?

En emprima lingia dependi natiralmain dal product ch'ins vuless cumprar – u en quel cas – regalar. Ma la buna nova è che, tgi che cumpra ses regals da Nadal pir il december, na paja betg exnum dapli, che durant il rest da l'onn. Quai manegia Pascal Seiler, che perscrutescha il svilup da pretschs per il post da perscrutaziun da conjunctura (curt KOF) da la ETH Turitg, envers SRF.

Vestgadira ed artitgels da sport d'enviern: pli favuraivel il schaner

Singuls products crodan dentant tuttina si cun grondas midadas da pretsch avant e suenter Nadal. Per exempel vestgadira – che para d'esser pulit dumandada sco regal da Nadal. Sch'ins va ussa per las butias percorschan ins, ch'ins avess pudì spargnar in bun daner cun cumprar il pullover da caschmir per il bab u la giacca da skis per la figlia pir il schaner. Uss crodan ils pretschs per vestgadira, perquai che las butias na vulan betg restar tschentadas sin tals products stagiunals, ch'èn forsa betg pli dumandads la proxima stagiun d'enviern. Il medem «fenomen» sa repeta dal reminent il fanadur, cura che la vestgadira da stad sto davent.

In maletg sumegliant sa mussa tar artitgels da sport d'enviern, sco skis ed aissas. Tar quels products è la dumonda la pli auta cura che la naiv vegn, manegia Thomas Morand, il schef da Bächli Bergsport envers SRF. A partir da l'atun vegnan tals artitgels pli chars ed a partir dal schaner puspè pli favuraivels. E grad tar quella fatschenta d'exempel possian ins cumprar l'equipament d'ir cun skis il pli favuraivel a partir dal matg.

Ma i dat er products ch'èn pli favuraivels avant Nadal. Uschia in exempel èn consolas da gieus e gieus electronics. Il motiv per quai enconuscha il manader da la cumpra dal Mediamarkt Svizra, Thomas Triet: Il temp da Nadal saja per l'industria da gaming ed er per sia atgna fatschenta fitg impurtanta, explitgescha el envers SRF. In pau auter saja quai tar televisiuns e computers. Tar models novs dettia pli pauc e tar models pli vegls dapli rabats. Qua rendia damai da guardar pli exact per tge products ch'ins sa decida.

Pertge datti quellas adattaziuns da pretsch durant l'onn?

La strategia da pretschs da las butias è savens secreta. Ma ina retschertga dal KOF dal 2022 dat in pau scleriment; quella mussa che «la fatschenta svizra media» adattescha ses pretschs mintga trais mais. Dentant vesia ins tut: da fatschentas che adatteschan lur pretschs mintga di, enfin quellas che fan quai mo ina giada l'onn. E fatschentas online adatteschan lur pretschs pli savens che las fisicas.

Sco raschuns per quellas adattaziuns da pretschs han las fatschentas surtut inditgà facturs nua ch'ellas han sez nagina u pauca influenza. Sco per exempel midadas tar custs da persunal, material u custs d'energia. Sche quai vegn pli char ston las fatschentas er vender ils products pertutgads per dapli daners en las butias. En tals cas vegnan augments da pretschs dal rest er acceptads plitost tar consumentas e consuments. Sch'ina fatschenta vuless dentant profitar memia fitg d'ina auta dumonda per in product, cun augmentar ils pretschs, na sustegnia la clientella per regla betg quai.

Quai declera er daco che bleras fatschentas desistan il december da vender lur products per pretschs pli auts.

Tge product datti cura il pli bunmartgà?

SRF ha creà in tool per guardar cura che tge products èn il pli favuraivel u il pli char. Vus pudais inditgar qua sut il product – per tudestg – e guardar cura ch'il meglier mument è per cumprar.

Datas

Avrir la box Serrar la box

Las datas en quest artitgel e la contribuziun correspundenta derivan dal post da perscrutaziun da conjunctura da la ETH Turitg (KOF), ch'ha evaluà las datas tenor criteris scientifics per SRF.

RTR actualitad 07:00

Artitgels legids il pli savens