Seser sin balcun, giudair la rendida dal sulegl ed enta maun in frestg glas vin alv. U ina deliziusa tschavera tranter amis ed in bun dagut vin cotschen. Tals scenaris tunan forsa bain, vegnan però adina pli rars. Svizras e svizzers consumeschan adina damain vin, sco las novas cifras da l'Uffizi federal d'agricultura mussan.
Questas cifras fan dar in sigl. Però, in trend negativ constatain nus gia dapi 10 onns. Perquai hai jau uss sentiments maschedads.
Grischun noda minus da 6%
Tar il vin grischun è il consum tschessà main fitg che tar il vin svizzer. L’onn passà ha il minus muntà a 6%, tge che giascha en la media dals ultims onns.
La gronda part dal vin grischun vegn producì en la regiun dals Tschintg Vitgs, nua che RTR ha visità l'onn passà in di da vendemia.
Midada tar las disas da consumar
Ch’i vegn consumà damain vin ha differentas raschuns. L’Uffizi federal d’agricultura discurra da «disas da consumar» che sajan sa midadas. I vegn bavì en general damain alcohol ed uschia er damain vin. E cunzunt glieud giuvna volvia il dies al vin, malgrà che la tradiziun da vin saja francada en la cultura svizra. In sumegliant maletg sa mussa er en auters pajais europeics, scriva l’uffizi federal vinavant. Il cumissari da viticultura al Plantahof, Walter Fromm, menziuna en pli che novas leschas pli rigurusas impedeschian per part il consum da vin.
Istorgias persunalas: Dus piuniers e lur vin
Associaziun professiunala «Vin Grischun» prenda mesiras
Per ch’i vegn il futur puspè consumà dapli vin grischun ha l’associaziun professiunala «Vin Grischun» prendì emprimas mesiras. La finamira è da puspè tschiffar pè al martgà indigen, vul dir en la gastronomia, sco Walter Fromm che fa er part da la suprastanza da l’associaziun professiunala declera. Emprimas ponderaziuns haja l’associaziun fatg avant trais onns ed entant haja quella engaschà in persuna dal fatg che s’occupa da la vendita dal vin grischun. Sche las mesiras prendidas na portian betg fritg, vegnia quai a dar consequenzas economicas, cunzunt per manaschis pli pitschens. Manaschis pli gronds possian sa posiziunar pli divers ed hajan perquai ina meglra posiziun al martgà.
Tar tut las consequenzas negativas ch’il pli pitschen consum da vin ha per l’economia, pudessan ins er pensar «Mah prima, Svizras e Svizzers baivan damain vin e vivan pli sanadaivel!». Sin talas remartgas ha Walter Fromm ina clera resposta:
Jau na metta il vin betg sin il medem stgalim sco il consum d’alcohol. Vin è in product da giudair.