16 da 25 bogns averts en il Grischun ed en Glaruna na han betg passà ils tests dal uffizi da segirezza da victualias e per la sanadad d'animals dal Grischun. L'uffizi ha intercurì la qualitad d'aua durant ils mais fanadur ed avust 2022. Restanzas da pel u urin reageschan en l'aua cun clor. Uschia pon substanzas nuschaivlas sa furmar.
Valurs maximala da chemicalias surpassadas
En tut hai dà 42 provas ord ils 25 bogns. 11 giadas è la concentraziun da clorat stada memia auta. Clorat è in product ord clor ed urin, ed è nuschaivel per l'organissem dal carstgaun. 10 giadas è vegnida surpassada la valur maximala per clor liber. 5 giadas è l'aua stada memia turbla, u che la valur da PH na consteva betg. Il dumber da scherms total è vegnì surpassà duas giadas.
Quest onn è il resultat da las controllas stà meglier che l'onn passà, sco l'uffizi ha annunzià. L'uffizi ha dumandà ils bogns averts cun qualitad insuffizienta da meglierar lur tecnica da nettegiar l'aua. L'uffizi scriva dentant er che nettegiar saja in process cumplex.
