Per la quarta giada candideschan ils dus cussegliers dals chantuns existents, Martin Schmid e Stefan Engler per ils dus sez a Berna. E quai cun magari grondas schanzas da vegnir reelegids. Sper els dat quai anc in terz candidat, quai è Hans Vetsch.
In cumbat senza cumbat
In cumbat electoral, senza cumbat, uschia pudess'ins numnar la situaziun da Stefan Engler e da Martin Schmid. Omadus èn vegnids elegids il 2011 en il Cussegl dals chantuns e vegnids reelegids duas giadas. Nagin cumbat è agreabel per las finanzas, ma uschiglio? Stefan Engler è da l'avis ch'in cumbat electoral cun pli paucs candidats saja pli agreabel cunquai ch'i dettia per exempel pli paucas sairas da podi.
Dentant era quai ina legislatura cun diversas crisas e ch’ha pretendì bler da nus dus.
Omadus eran cussegliers guvernativs dal Grischun. Martin Schmid da quest temp gia tar la Partida liberaldemocratica e Stefan Engler era fin tar la fusiun commember da la Partida cristiandemocratica, ussa da l'Allianza dal Center. Uschia eran ils dus politichers ensemen en la regenza e dapi 12 onns ensemen en il Cussegl dals chantuns.
Nus na faschain betg politica cun tuns dad auts, ma en in gremi da 46 persunas avain nus ina influenza maximala sche nus cumparain unids per il Grischun.
Nagina rivalitad tranter Schmid ed Engler
Els dus èn in duo, ma da differentas partidas. Quai funcziuna cunquai ch'els sajan era pronts da tadlar tiers e considerar ils arguments da l'auter. Però i dat era differenzas tranter ils dus cussegliers. Martin Schmid sustegna il suicidi assistì tras medias e medis, Stefan Engler però betg. U alura era tar las impostas: Stefan Engler vuless che pèrins pajan vinavant ensemen las impostas, Martin Schmid sustegna che pèrins èn suttamess individualmain a las impostas.
E sco politichers grischuns han els era in’opiniun tar il luf. Tenor Stefan Engler han intgins da la Bassa ina vista romantica ch’els han gust vi dad ina natira cumpletta. Dentant restian ils problems en las regiuns cun ils lufs. E Martin Schmid fa cler ch'il luf n'è betg in tema che pertutga paucs, mabain tuts.
Hans Vetsch na quinta betg cun ina schanza
La terza persuna sin il carussel d'elecziuns è Hans Vetsch, il candidat independent per il Cussegl naziunal e Cussegl dals chantuns.
El è architect a Grüsch ed ha gia l'onn passà candidà per la regenza grischuna. Per questa elecziun naziunala na quinta el betg cun ina schanza reala. Ses motiv principal saja da porscher ina elecziun ed uschia in cumbat.
I n'è betg bun sche las partidas sa cunvegnan ch’ellas na fan betg cun tar las elecziuns dal Cussegl dals chantuns – quai para sco ch’ins na vul far nagina dolur a l’auter.
