Siglir tar il cuntegn

Header

Navigaziun

Legenda: Guardar il video Dà in'incumbensa senza scriver ora: Quai ha il chantun fatg en connex cun la renovaziun dal convict. Durada 03:02 minutas.
Or da Telesguard dals 18.03.2019.
cuntegn

Grischun Convict: Chantun ha surdà lavurs senza scriver or

Il chantun n'ha betg scrit or las lavurs per il provisori da lain, mabain surdà quellas direct ad ina firma grischuna. Quai han retschertgas da Schweiz Aktuell mussà.

En il mument vegn il convict, il dachasa da massa scolars da la scola chantunala a Cuira durant l'emna, sanà per 30 milliuns francs. Quest credit aveva il parlament grischun approvà l'onn 2017. Uschia n'èsi betg pussaivel da duvrar quest bajetg il mument. Il chantun ha uschia laschà construir in provisori da lenn per 2.6 milliuns – la sedia provisorica per ils scolars.

Il chantun n'ha betg scrit or las lavurs per il provisori. Quai mussan retschertgas da Schweiz Aktuell. Il chantun ha surdà questa lavur a la medema firma grischuna, ch'è era vid las lavurs dal convict sez. Tenor Markus Dünner, l'architect chantunal, haja quest fatg gì dus motivs principals :

  • La firma grischuna porschia ina purschida innovativa, unica e ecologica cun lur provisoris da lain.
  • Cun surdar las lavurs a la medema fatschenta saja l'entir project sut in tetg. La planisaziun saja uschia in bun toc pli simpla.

Arguments dal chantun na persvadan betg spezialist

Il professer a l'Universitad Son Gagl Peter Hettich, spezialist da submissiun, declera ch'i saja mo en cas excepziunals usit da betg scriver or lavurs.

Uschia per exempel tar lavurs da bagatellas, pia lavurs pitschnas cun custs da sut 300'000 francs, u tar lavurs che fan prescha, sco suenter catastrofas da la natira. L'argumentaziun daco ch'il chantun n'haja betg scrit or questa lavur na persvadia dentant betg, di Peter Hettich.

Er tema en la politica

Ils deputads Philipp Wilhelm da la PS e Vera Stiffler da la PLD n'èn betg persvas da la decisiun dal chantun Grischun. Scriver ora in tal project saja il meglier per chattar la meglra soluziun e restar transparent. Ils deputads pondereschan perquai da far ina dumonda a la regenza davart quella surdada da lavurs durant la proxima sessiuns en l'ura da dumondas.

RR actualitad 17:00