Actualmain discutescha il pajais Tirol en Austria davart ina candidatura per gieus olimpics d’enviern 2026. Tirol cun il center Puntina (Innsbruck) pudess profitar da gieus olimpics – quai mussa in studi da factibilitad. Sch'ins auda ussa il chavazzin impurtant, sche tuna la candidatura austriaca pli u main sco quella grischuna ch’ha fatg naufragi il favrer da quest onn: Gieus persistents, nagin gigantissem – gieus che portan in niz a la populaziun ed a l'economia da la regiun.
Betg ina copia
Ils auturs austriacs dal studi da factibilitad din dentant envers Radiotelevisiun Svizra Rumantscha (RTR) che lur candidatura na saja nagina copia da la candidatura grischuna. I saja simplamain uschia ch'ins stoppia considerar ils puncts da l'agenda 2020 dal comité internaziunal olimpic. Quai hajan ils promoturs da gieus olimpics en il Grischun fatg fitg bain e la medema lavur stoppian uss far ils promoturs per gieus en il Tirol. Il promotur d’ina candidatura grischuna Andreas Wieland ha dentant ditg envers RTR ch’el haja gì contact cun ils promoturs dal Tirol suenter il «na» grischun. El haja inditgà ad els l'adressa d'internet da la candidatura grischuna.
Betg scuidus
Il cusseglier guvernativ grischun Jon Domenic Parolini ha ditg envers RTR che la regenza n'haja insumma nagin problem cun la candidatura dal Tirol. Anzi: Parolini giavischa bun success ed è persvadì che tut ils lieus che restan en concurrenza per ils gieus dal 2026 stoppian candidar da sumeglianta maniera sco il Grischun avess fatg. Parolini avess gust da pudair visitar gieus olimpics en il Tirol l'onn 2026, sche quels daventassan propi realitad. Quai faschess era Andreas Wieland, sco voluntari.
La populaziun dal Tirol votescha quest atun davart ina eventuala candidatura.
RR actualitad 11:30
