Il coronavirus occupa vitgs e valladas. Sa tegna la glieud vid las prescripziuns actualas? E tge fa la glieud cun lur temp liber?
Ils correspundents da RTR dattan pled e fatg
Dapi la sonda èn gruppas da dapli che tschintg persunas en publicitad scumandadas. Quai ha decidì il Cussegl federal. Sco era la situaziun en Engiadina sur la fin d'emna, as tegna la glieud vi da las prescripziuns?
A Zuoz è Anna Caprez stada en acziun. La glieud sa tegnia bain vi da las reglas e stettia a chasa. I crodia en egl che blers turists talians sajan en lur abitaziuns da vacanzas. Plinavant dettia er gruppas pli grondas che fetschian turas cun skis.
Sco Federico Belotti rapporta, sajan a Savognin blers ids a spass, dentant betg grondas gruppaziuns. Gruppas pli grondas sajan be stadas famiglias. Er uschiglio sa tegnia la glieud era bain vid las reglas, la distanza da dus meters vegn adina resguardada. La solidaritad è gronda: Avant scola è vegnì montà ina taila nua ch'ins ha pudì leger: «Esser da part per restar ferms.»
En Surselva ha Linus Livers lavurà sur la fin d'emna. Per evitar blers contacts ha el fatg las intervistas per telefon. Per far fotografias è el dentant stà sin il recicladi a Rueun. La situaziun che blers han liber pervia dal corona ha chaschunà là per bler traffic e manaschi.
Resun ord las regiuns: gievgia, 19-03-2020
Anna Caprez lavur oz davent da Zuoz. Per pudair raquintar istorgias actualas da la regiun è ina buna planisaziun essenziala. Sco dapertut ston er ils reporters en l'Engiadina resguardar las reglas dal «social distancing» tar intervistas etc.
En Surselva fa noss reporter Linus Livers oz home-office. Davent da Camuns planisescha el ils temas da la fin d'emna. En vista al coronavirus è quai ina gronda sfida. Er en il Grischun Central dominescha il coronavirus la planisaziun.
Resun ord las regiuns: mesemna, 18-03-2020
En l'Engiadina sa fatschentan noss reporters actualmain cun las situaziuns dals scolars. Fertant che las scolas primaras ston anc elavurar in concept per la scolaziun sin distanza, funcziunescha quai gia per ils scolars pli vegls. Lur lavur fan ils redacturs da l'Engiadina per part er davent da chasa. Cunquai che las raits dad internet n'èn betg adina tuttina fermas, pretenda quai dad els er flexibilitad.
Noss correspundent a Glion, Linus Livers, è oz mesemna turnà dal home-office a Camuns puspè a Glion en biro. El ha entupà ina citad tut vida cun parcadis libers e naginas colonnas avant la barriera dal tren – in pau sco sch'i fiss dumengia.
Ed er a Savognin èsi vegnì pli quiet ils ultims dis. Federico Belotti è stà en il Volg dal vitg ed ha constatà che las curunas èn puspè emplenidas. Igl haja er a Savognin dà che tscherts products eran vendids ora ils ultims dis, ha la vendidra ditg ad el.
