Gist plirs deputads dal Cussegl grond han fatg dumondas a la regenza en connex cun fatschentas fictivas en il Mesauc. Tranter auter han els pretendì ch'il plan d'acziun cunter la mafia e la criminalitad organisada che la Confederaziun ha decidì per il Tessin vegnia er extendì sin il Grischun. Er la regenza vul quai. L'emna proxima vegn ella a pretender da la Confederaziun d'extender quest plan er sin il Mesauc. Da cumbatter criminalitad organisada è in pensum da la Confederaziun e betg dals chantuns.
Evitar in spustament da firmas fictivas dal Tessin en il Grischun
L'idea è d'uschia meglierar il cumbat cunter firmas fictivas ed evitar che firmas che fan fatschentas illegalas sa spostan dal Tessin en il Grischun dal Sid. Ultra da quai ha l'Uffizi chantunal d'industria, lavur e mastergn intensivà las controllas. Las polizias sco er las procuras publicas dal Grischun e dal Tessin duain intensivar la collavuraziun per cumbatter mafia e firmas fictivas.
RTR actualitad 12:00
