En collavuraziun cun canortas da giuvenils ed uniuns sco per exempel ils batasenda u la riga verda, organisescha la Blue Cocktail Bar da la Crusch blaua en l'entira Svizra curs per emprender da maschadar
drinks senza alcohol. Fatg part da la concurrenza han er 165 giuvenils dal grischun.
Inscuntrar ils giuvenils en lur mund
La spezialitad dal project saja la coliaziun dal mund analog cun il mund digital. Per l'ina dettia ils curs «analogs» al lieu, e per l'autra dettia dentant er ina cuminanza digitala en las medias scoialas nua ch'ils giuvenils possian mussar lur drinks. E la lavur da giuvenils haja a disposiziun material digital da prevenziun per sensibilisar en moda e maniera simpla per la tematica. Gist quella cumbinaziun d'analog e digital e la collavuraziun cun la lavur da giuventetgna e differentas uniuns saja fitg impurtanta, di Vinzenz Stipper, il menader da la Blue Cocktail Bar da la Crusch blaua dal Grischun.
Prevenziun da dependenza sa funcziunar sch'ella ha lieu en l'ambient da viver dal giuvenils.
Grazia a la collavuraziun cun la lavur da giuvenils e differentas uniuns saja pussaivel da cuntanscher blers giuvenils, qua saja ina gronda fermezza dal project.
Resuns positivs
Ils resuns dals participants e las participantas sajan positivs. Ils giuvenils hajan plaschar da crear ed inventar lur agen drink senza alcohol. Er il resun da la lavur da giuventetgna e da las uniuns saja positiv. Tar la concurrenza datti er da gudagnar insatge: il victur u la victura dal final da la «Creative Drink Challenge» dal Grischun po sa legrar dad in viadi en in parc d'aua en Svizra. Il final grischun ha lieu sonda ils 10 da zercladur 2023 a chaschun da la festa da stad da la lavur da giuvenils Cuira sin l'areal dal Stadtbaumgarten. Ils finalists e las finalistas vegnian quel di a maschadar e preschantar lur creaziuns ad ina schuria dal fatg.
recept da Filipa da Samedan
2 cl sirup da grenadina
4 farbuns
4 izuns
12 cl Flauder
2 cl suc da citronas
Manizzar ils fritgs cun il murter, emplanir cun crushed ice ed aschuntar las auas
Decoraziun: spidun cun izuns ed ampuaunas, fegl d'ananas e talgia da limetta
recept dad Anastasia da San Murezzan
10 cl crushed Ice
2 cl sirup da grenadina
4 cl tonic hibiscus
4 cl suc da giglidra americana (Cranberry)
Metter tut las ingredienzas en il shaker e mixar
Decoraziun: ur da zutger cotschen, spidun cun frajas, ampuaunas ed ivas cotschnas
recept da Mael da Cuira
2 cl sirup da fritg da la Passiun
1 cl sirup da Blue cocuare
15 cl glatsch
12 cl suc da fritgs (ivas e limettas manizzadas)
Manizzar ivas e limettas, cular duas giadas. Emplenir magiel cun glatsch, aschuntar la mesadad dal suc da fritg ed aschuntar ils dus sirups. Emplenir cun il rest dal suc da fritgs.
Decoraziun: duas talgias da limetta satiglias ed in inzun