La critica principala da las organisaziuns è che la populaziun na saja betg vegnida integrada avunda en l’elavuraziun dal concept. Quai communitgeschan 12 organisaziuns da l’ambient e da la sanestra, tranter auter la PS da Cuira, la glista libra verda, la Pro Velo ed il WWF Grischun. La populaziun n’haja betg pudì sa participar activamain, ella haja sulet pudì prender posiziun a scrit sin l’emprima versiun dal concept.
I dat tar la populaziun giavischs tar il svilup dal agen spazi da viver, quests avessan ins gì da ir per tut.
Tar il cuntegn dal concept vegn tranter auter crititgà ch’il concept da traffic na giaja betg avunda lunsch. Ins stuessi ir pli consequent davent dal traffic d’autos vi tar il traffic da velos ed il traffic public.
Vitiers saja la promoziun da la biodiversitad e las mesiras per cuntanscher la finamira dal Cussegl federal, dad esser l’onn 2050 neutral al CO2 – vegnì a la curta en il concept.
Cussegliera da la citad Sandra Maissen na prenda betg posiziun en detagl
Per l’ina n’hajan els anc betg survegnì questa critica da las organisaziuns, ha Sandra Maissen ditg envers radio SRF. Per l’autra duria la procedura per inoltrar ideas e critica anc enfin ils 31 d’avust. Tut tenor vegnian els silsuenter anc ad adattar il concept.