In travasch!
Gia da lunsch audan ins ils cloms e las risadas dals visitaders pitschens che siglian e curran enturn sin la staziun da posta a Cuira. En accumpagnament dals scolasts ed ils passa 120 gidanters, ch'èn en acziun durant quel bellezza di d'atun, sa movan els da post tar post.
Uschia visitan els tranter auter il post da tren da las Viafiers federalas svizras u era l'auto da posta da Cuira, nua ch'els discutan davart il cumportament correct en il traffic public. Ultra dals posts datti anc in program facultativ che cuntegna chastès da trampolin, ina visita tar il stan da la polizia da Cuira u er in parcours da velos.
-
Bild 1 von 5. Ils scolars e las scolaras a la staziun da Cuira. Bildquelle: Organisaziun di da traffic public.
-
Bild 2 von 5. Post dal tren Grischun. Bildquelle: Organisaziun di da traffic public.
-
Bild 3 von 5. Il conductur che discurra cun ils scolars e las scolaras. Bildquelle: Organisaziun di da traffic public.
-
Bild 4 von 5. Bildquelle: RTR.
-
Bild 5 von 5. Punct da finiziun a a la staziun da posta. Bildquelle: Organisaziun di da traffic public.
Ngadhmjesa Hasani, la manadra da project dal di da transport public 2023, po trair in facit zunt positiv.
57 classas cun totalmain 1'080 uffants èn sa participadas e paran da sa divertir bunischem. Quai ans fa cuntent.
Dentant n'èn betg mo ils organisaturs intgantads dal di, er ils mattatschs e las mattatschas paran d'avair rimnà impressiuns allegraivlas. Ils visitaders da 9 e 10 onns han gia favurits persunals. «Mes post favurit è quel da l'auto da polizia, perquai che nus dastgavan seser davant, sco vairs policists e policistas,» di Lara, ina scolara. Dorvin, in auter scolar, di ch'il mobil da tschorvs plascha ad el il meglier, quai saja stà ina experientscha fitg coola.
Cun ina finiziun communabla sin la staziun da posta, chantond ina chanzun da transport public, finescha quel di legraivel ed infurmativ ed ils uffants sa fan puspè sin via a chasa, natiralmain cun il transport public.