Siglir tar il cuntegn

Header

audio
Reacziun da Patrik Degiacomi sin l'enquista
Or da Actualitad dals 25.05.2023. Maletg: Keystone
laschar ir. Durada: 3 minutas 39 Secundas.
cuntegn

Cuira Enquista mussa las pitgiras da la giuventetgna

La citad da Cuira ha infurmà davart in'enquista tar tut las persunas tranter 13 e 15 onns a Cuira. Ils pli impurtants resultats en in'egliada:

  • Sanadad psichica: In terz da las persunas dumandadas din ch'ellas hajan durant plirs dis u dapli che la mesadad dals dis patratgs d'esser pli gugent mortas, u ch'ellas veglian far mal a sasez.
  • Consum da drogas: 50% han gia bavì alcohol, 28% han consumà tubac, 9% han consumà cannabis e 7% autras substanzas. Quai è en tut ils cas dapli ch'en autras vischnancas svizras.
  • Violenza en relaziuns: 33% da las persunas rapportan ch'ellas hajan fatg experientschas cun violenza en lur relaziuns da pèr. Il pli savens datti violenza verbala (27%). Er quai è dapli ch'en auters lieus (22%).

Detagls davart l'enquista

Avrir la box Serrar la box

L'enquista è part da la strategia da prevenziun da dependenza da la citad da Cuira. Part dal program che la citad ademplescha è il questiunari.

Durant il november e december 2022 han 74% da las persunas tranter 13 e 15 onns che vivan a Cuira emplenì ora in questiunari. En tut èn quai stads 660 questiunaris emplenids ora.

L'Universitad Turitg ha analisà ils questiunaris, e la citad Cuira ha mess a disposiziun ils resultats.

Ils resultats pon vegnir cumparegliads cun quels da 12 autras vischnancas svizras, damai ch'i ha dà là la medema enquista. Uschia sa mussan per exempel differenzas co che la giuventegna da Cuira viva ina relaziun da pèr:

  • 50% da las persunas rapportan ch'ellas sajan gia vegnidas survegliadas en lur relaziun (en autras vischnancas: 42%)
  • 30% din ch'ellas n'hajan betg dastgà entupar in'autra persuna (21% en autras vischnancas)
  • 10% din ch'ellas sajan vegnidas sfurzadas da far acts sexuals (11% en autras vischnancas)

Ils giuvenils èn er vegnids dumandads tge che protegia els: cunzunt tar la solidaritad en famiglia (mo 50% han inditgà quai cumpareglià cun 61% en autras vischnancas) ed il sustegn tras auters giuvenils (53% cumpareglià cun 59% en autras vischnancas) hai dà grondas differenzas.

Reacziuns

Il cusseglier da la citad Patrik Degiacomi, ch'è responsabel per il Departament d'educaziun e cultura, ha ditg ch'el saja per l'ina schoccà dal resultats. Per l'autra saja el surprendì da la reacziun positiva e l'engaschi dals giuvenils. En trais scuntradas en scolas da stgalim aut a Cuira hajan els discuttà ils resultats.

Co far frunt als problems?

Ins stoppia savair nua ch'ils ristgs sajan per pudair prender mesiras da prevenziun, uschia Degiacoi vinavant. Sin basa dals resultats vul Degiacomi elavurar in plan d'acziun che cumenza il 2024. Las discussiuns mussian dentant gia che las persunas giuvnas vulan cunzunt avair in pled tar decisiuns dals creschids e creschidas che pertutgan ellas.

audio
Per tadlar: curt e cumpact
ord RTR Audio dals 25.05.2023.
laschar ir. Durada: 1 minuta 25 Secundas.

RTR novitads 12:00

Artitgels legids il pli savens