Legos, autos, cudeschs, poppas, ursets, gieus e puzzles – il sortiment ch'è stà en vendita durant la fiera da plugls da Cuira è vast. Dentant propi il hit èn anc adina ils classichers: Legos e cudeschs vegnan vendids sco emprims.
Tranter ils uffants èn quasi gia futuras banchiera u futurs brokers: Els han numnadamain differentas strategias co martgadar: «Jau dumond in pretsch in zic pli aut ch'jau haja anc spazi per ir engiu», di in buob. Ubain, er ina buna strategia: «Tar mai survegnan las buobas in fermagl da chavels gratuit sch'ellas cumpran insatge».
Auters uffants èn pli precauts: «Sch'jau vi in pretsch memia aut na vegn il client forsa betg pli», di ina buoba. In'autra fa il pretsch spontan tenor il sentiment dal venter: «I dat er persunas e famiglias che n'han betg uschè blers daners, lura poss jau reducir il pretsch da 4 sin 2 francs.»
Spargnar empè da reinvestar
Ils raps ch'els fadian cun lur termagls vegls mettan ils blers uffants sin il conto da spargn. Be ina buoba reinvestescha 10 francs per insatge da la fiera. Il rest da ses gudogn va dentant er sin il conto da spargn.
Las mammas e babs, tats e tattas observan, co lur junioras e juniors martgadeschan. «Per mai èsi impurtant ch'els emprendan uschia d'enconuscher la valita da la rauba e co ir enturn cun raps», di ina mamma. In'autra agiunta: «Els emprendan er, ch'ins na sto betg adina cumprar tut nov, che chaussas pli veglias funcziuneschan er anc ed èn bunas».