Il glindesdi saira dals 15 da settember 2025 ha gì lieu a Cuira en la Werkstatt, la bar da cultura amez la citad veglia, l'emprim Pub Quiz Rumantsch. In'occurrenza luca per glieud che ha gust da s'entupar, schliar in quiz e baiver ina biera u duas. Radund 50 persunas èn sa radunadas per questa premiera.
Il rappunz Ivo Orlik ha surpiglià la rolla dal quizmaster per la saira. El di ch'el saja cuntent ch'el possia mo tschentar las dumondas e las na stoppia betg era respunder. Perquai ch'ellas sajan per part detg pretensiusas.
-
Bild 1 von 4. Las reglas dal Pub Quiz Rumantsch. Bildquelle: RTR.
-
Bild 2 von 4. La boxa da respostas. Bildquelle: RTR.
-
Bild 3 von 4. 10 gruppas han fatg part a l'emprim Pub Quiz Rumantsch. Bildquelle: RTR.
-
Bild 4 von 4. La Werkstatt a Cuira è stada l'ospitanta da l'emprim Pub Quiz Rumantsch. Bildquelle: RTR.
10 gruppas da tschintg persunas èn sa participadas al quiz. Las reglas eran simplas: trais rundas cun mintgamai set dumondas. Tar mintgina han las gruppas ina minuta temp per nudar las respostas sin in fegl. Natiralmain senza agid da telefonins. Ed a la fin da mintga runda datti puspè set minutas temp per repassar e finalisar las respostas. Il fegl cun tut las respostas sto lura vegnir plazzà en ina boxa sper il quizmaster e quai avant ch'il countdown è a fin.
Tranter las rundas devi pausas da 15 minutas per sa recrear e baiver insatge. Ma betg per Uolf Candrian, per lez èn las pausas ils muments ils pli intensivs. El sto curreger e repassar tut las respostas e dar puncts.
Suenter la terza runda crescha la tensiun. Tge gruppa daventa l'emprima victura da l'emprim Pub Quiz Rumantsch? Las resposta: Quasi la mesa bar. I dat ina terza plazza e mintgamai duas segundas ed emprimas plazzas. Ils premis che consistan surtut d'alcohol, sco quai ch'igl è usit tar pub quiz, vegnan damai repartids.
Ed Alina Müller, l'inizianta da l'eveniment, è stada cuntenta cun l'emprima ediziun: «La glieud ha gì plaschair, quai è il pli impurtant.»
Per tuts e tuttas che han gust da sa participar: la proxima ediziun dal Pub Quiz Rumantsch ha lieu il november a Berna. Co ch'i va suenter quella ediziun enavant cun il format stat per il mument dentant anc en las stailas.