Quants uffants da l'Ucraina che vegnan a Cuira na sa il cusseglier da la citad Patrik Degiacomi anc betg. El quinta cun il pli bler 300 uffants. Tuttina duai la scola esser bain preparada e tschertga perquai translaturas, scolasts ubain accumpagnadras per instruir ils uffants da l'Ucraina. Els duain spert puspè pudair ir a scola, per uschia vegnir sin auters patratgs, crear novs contacts e pudair s'orientar en in nov sistem, scriva la scola.
Per il mument èn gia 4 scolaras e scolars da l'Ucraina en las scolas da Cuira. Sco emprim van els en ina classa per emprender il linguatg. Suenter circa 12 emnas è planisà ch'els van en ina classa regulara. Impurtant saja dentant, «ch'els sa sentian bain, segirs e ch'els sentian normalitad», di Patrik Degiacomi. Perquai vegn er il persunal da scola sensibilisà:
Els dovran gronda empatia e l'uffant sto savair ch'el po sa fidar da las persunas d'instrucziun
Er famiglias ospitantas dumandadas
In segund appel ch'il cusseglier da la citad ha fatg a las scolas sco er a las medias è, che famiglias ospitantas che prendan si persunas da l'Ucraina duain er uschè svelt sco pussaivel annunziar ils uffants a las scolas.