La citad da Cuira ha dà la lubientscha da construcziun per fabritgar la terza tur a Cuira Vest. Quai ha communitgà la societad da construcziun City Vest. Las lavurs da construcziun duajan cumenzar l’auter favrer ed esser terminadas en il decurs dal 2028. La nova chasa auta cumpiglia 77 abitaziuns sin 22 auzadas.
La tur vegn construida en il quartier City Vest sper las duas autras turs autas ed en vischinanza da la staziun da tren che vegn actualmain bajegiada or da la Viafier Retica e la citad da Cuira.
La terza chasa auta è stada ditg sin chommas falombras
Suenter ch'il suveran da Cuira aveva approvà il 2024 il contract da dretg da construcziun a Cuira Vest – avevi dà in recurs encunter questa surdada dal dretg da construcziun. L'avrigl 2025 è quest recurs lura vegnì liquidà.
La dretgira administrativa dal Grischun n'era betg entrada en chaussa perquai ch'il recurs era vegnì inoltrà memia tard. Quai ha il Tribunal federal a Losanna decidì. Il recurrent aveva crititgà ch'il cussegl da la citad haja infurmà votantas e votants a moda insuffizienta davart il project.