En la gronda halla dal Plantahof preschentan 14 producents e productentas var 30 differentas sorts da chaschiels grischuns. Da chaschiel lom e cremus sur savurus ed intensiv fin chaschiels dirs, mols e blaus.
Las persunas ch'han degustà la schelta da chaschiels grischuns èn en emprima lingia persunas da la gastronomia, da l'hotellaria sco era da differents affars. Pia precis quellas persunas che decidan a la fin, tge chaschiel che vegn sin la carta dal menu, u tge chaschiel che vegn vendì en la butia.
Dapli che mo ina degustaziun
Il forum da chaschiel duess però esser dapli che mo ina degustaziun. En il center stevan il barat persunal, l'emprender d'enconuscher las persunas davos ils products sco er la furmaziun da novas raits.
Ins duai emprender d'enconuscher las chascharias e las persunas davostiers – e natiralmain era il chaschiel. La fin finala essan nus qua per colliar las persunas per ch'i dettia novs models da fatschenta.
Sfidas per chascharias grischunas
Malgrà l'auta qualitad èn bleras chascharias grischunas sut squitsch. In ulteriur problem è la concurrenza da l'exteriur. Chaschiel importà è savens pli favuraivel, ed i vegn fatg dapli reclama. Perquai è il chaschiel importà era pli preschent en las butias ed en la gastronomia ch'il chaschiel regiunal.
L'emprim forum da chaschiel grischun ha mussà che l'interess per chaschiel regiunal è grond ed il potenzial è en mintga cas avant maun. Ils producents ed ils affars han pudì sa barattar ed emprender l'in da l'autra. La finamira è clera: En l'avegnir duain ins chattar il chaschiel grischun pli savens sin ils plats ed en ils regals da la regiun.