Cun discurrer da la cultura e la lingua a Claustra glischan ils egls da Jöri Luzi. Il scolast pensiunà ch'ha dà scola 44 onns tgira e viva il tipic dialect e la cultura dals gualsers a Claustra. El po raquintar l'entira istorgia da la vischnanca dapi la fundaziun avant 800 onns enfin il di dad oz.
Fastizs rumantschs – Mezzaselva, Serneus u Clavadiel
Avant ch'ils gualsers e las gualsras èn vegnidas e sa chasadas era la populaziun en il Partenz rumantscha. Zic a zic durant il 12, 13 e 14avel tschientaner èn adina daplirs vegnids, sa maschadads cun ils rumantschs e las rumantschas e la finala ha il tudestg prendì surmaun. Enfin il 19avel tschientaner haja dentant dà famiglias che discurrivan anc rumantsch, di Jöri Luzi. Restà dal rumantsch è oz dentant betg bler auter che inscripziuns da chasa u nums da fracziuns e lieus sco Mezzaselva, Serneus u Clavadiel.
En stanza da scola, famiglia e cun organisar occurenzas culturalas tgira Jöri Luzi il tipic dialect dal Partenz. Per el in stgazi ch'el è fitg losch. El è er persvadì ch'ils originals dal Partenz portan anc oz valurs da las gualsras sco esser lavurusas, genuinas e tradiziunalas.
Pitschen vocabulari dal dialect da «Chloschtersch»
| Gögel / göggelen | scarsola / scarsolar |
| Immi | avieul |
| Quatterpeetsch (Alpensalamander) | deriva dal rumantsch: quatterpezza |
| Pfiiholder | tschitta |
| Zmäränd | gentar |
| Lusi | plaschair |
