Tuts dus, pia la Somedia ed era Roger Schawinski e Stefan Bühler vulevan che lur radio haja num «Radio Grischa». Radio Südostschweiz ha adina puspè duvrà quest num, ed aveva uschia era il sentiment d'avair il dretg sin quest. La Dretgira superiura ha la finala decis en chaussa, e dà in scumond a Radio Alpin da duvrar il num «Radio Grischa».
L’entschatta 2025 hai dà in mument decisiv en la dispita davart la concessiun da radio per la Svizra Sidorientala e Glaruna. La Somedia ha numnadamain tuttina survegnì la concessiun da radio ed uschia ils 2,8 milliuns francs per onn. Quai è stada ina surpraisa cunquai che l'Uffizi federal da communicaziun Bakom ha il 2024 en sasez decis che Roger Schawinski e Stefan Bühler survegnian la concessiun.
Motiv per questa midada è stà che la Somedia ha fatg recurs ed il Tribunal administrativ federal ha decidì ch'il Radio Alpin haja gì memia bleras praticantas e praticants e memia paucas schurnalistas scoladas.
Era sche la decisiun dal Tribunal administrativ federal era en sasez definitiva – ha Roger Schawinski inoltrà ina dumonda da revisiun perquai che betg tut ils mussaments sajan vegnids resguardads. Questa revisiun è dentant vegnida refusada ed uschia èsi stà cler il december 2025 che la concessiun resta per diesch onns tar il Radio Grischa da la Somedia. Il radio Alpin Grischa ch'era online è cun questa decisiun vegnì serrà giu. Il chapitel da Roger Schawinski ch'ha vulì rumper il monopol da medias en Grischun è terminà.