Cumediant grischun - Rolf Schmid na po e na vul propi betg pli

Ussa cun 67 onns saja simplamain temp per in'autra fasa da la vita. E sco tat haja el uschè u uschia auter da far, di Rolf Schmid. Ed el manegia ch'el veglia bain er vegnir vegl, quai na saja el numnadamain anc mai stà. I vegnia ad esser uschia ch'ins na vegnia insacura betg pli ad enconuscher el, sch'el saja en gir. Mo quai saja en urden. El saja sa preparà sin quai. El craja che mintgin e mintgina che saja disà da star sin ina tribuna stoppia sa preparar ad uras sin quest mument. Rolf Schmid di ch'el saja led ch'el haja fatg quai.

35 onns ha el pudì sin tribuna

Ils emprims pass sin tribuna ha el fatg il 1991 cun la gruppa «3i» sper Andrea Zogg e Flurin Caviezel. Sia fatscha è alura vegnida enconuschenta cun in spot da reclama d'aua minerala. Il pasterner cun atgna fatschenta e prest 30 impiegads ha dà si tut per entschaiver danovamain l'onn 1999 - e per sa concentrar sin sia carriera sco cumediant. L'entschatta saja stada enorm greva. E lura è el vegnì enconuschent cun «I mag aifach nid».

Quai saja stà sco in da sis en il lotto. A partir da là haja simplamain funcziunà. Davent da là haja el pudì viver da l'esser cumediant. El n'haja davent da là mai pli stuì far insatge auter.

A la turnea da cumià mussa el sias pli enconuschentas scenettas – las ivettas da Rolf Schmid. Ses umor na tutgia betg mintga gust – natiralmain. Dentant na fiss el betg el sez, sch'el sa struvegiass per plaschair a mintgin. Quai n'haja el mai fatg. Dad ina vart saja el er mintgatant vegnì smaladì pervia da quai. Da tschella vart hajan ins er exact pervia da quai carezzà el. Ch'el haja simplamain «laschà or chaussas». La fin da sia preschentaziun l'entschatta favrer che nus avain visità a Landquart vegn el schizunt emoziunal.

Rolf Schmid en acziun

Ussa - suenter 35 onns - vai a fin. Cun ses program «i mag eifach nüma» va Rolf Schmid per l'ultima giada sin viadi tras la Svizra fin la fin da matg. Ed alura na po el lura propi betg pli.