Cun la populaziun ad ina segunda Ringstrasse

La partida burgais-democratica PBD da Cuira vul, che la situaziun da traffic en la zona Cuira-Nord sa megliurescha. Perquai ha ella lantschà ina petiziun. Sia soluziun: la Ringstrasse duai survegnir ina schumellina.

Laschar ir video «Il traffic a la rundella Cuira nord»

Qua passan 25'000 autos al di - la rundella Masans

0:09 min, dals 4.2.2016

Cuira-Nord, la bun’ura las 08:00: i dat colonna. Cuira-Nord, il suentermezdi las 17:00: i dat colonna. Tras questa fora da guglia sa smatgan di per di 25’000 autos per vegnir da la vart dal nord en la citad da Cuira. Il problem è enconuschent.

Cun sustegn da la poulaziun ad ina segunda tangenta

Per distgargiar la via da Masans e la Ringstrasse a Cuira, tschertga la PBD uss il sustegn da la populaziun. Fin als 22 da matg vul la PBD ramassar suttascripziuns per ina segunda tangenta, in segund rintg che maina inturn la citad da Cuira. Sche la populaziun da Cuira sustegna quista varianta, vul la PBD surdar in'ulteriura incumbensa cun la finamira da relaisar la tangenta e colliar l'access nord direct cun il quartier dal Rain.

La citad da Cuira avess uschia anc in auter rintg, ina via schumellina a la Ringstrasse, che manass tanter citad ed autostrada N13 enturn citad.

ASTRA era en bartga

La petiziun lantschada è bain adressada al cussegl da la citad da Cuira, duai dentant era influenzar l'Uffizi federal per vias ASTRA, di Oliver Hohl, president da la fracziun PBD en il Cussegl communal da Cuira.

Tant tar l’access a l’autostrada Cuira-nord sco era tar la rundella Masans è la cumpetenza numnadamain en mauns da l'ASTRA. Per ameglierar la situaziun da traffic en quel lieu dettia bain contacts cun l’ASTRA. Planisà, da definir nov l’access Cuira-Nord n’è dentant anc nagut, ha respundì il Cussegl da la citad da Cuira a l’interpellaziun da la PBD.

Gia surdà incumbensa per circulaziun dal traffic

L'onn 2012 aveva la PBD gia surdà in'incumbensa per meglierar la circulaziun dal traffic en il nord da la citad.

Uss vul la PBD mobilisar la populaziun per sustegnair quai, ch'è - tenor la PBD e ses president da fracziun, Oliver Hohl - ina mesira necessaria er en vista a l'engrondiment da l'ospital chantunal ed al svilup dal terren da bajegiar en la regiun Rückenbrecher, e na betg mo ina uschedetga "Pfläschterlipolitik", co ch'ella vegnia pratitgada actualmain.

RR novitads 8:00