Siglir tar il cuntegn

Header

cuntegn

Cuntrari al Cussegl federal Regenza refusa la reducziun da meds finanzials per l'agricultura

La regenza grischuna na vul betg scursanir ils daners per l'agricultura sco quai ch'il Cussegl federal propona. Sch'i va tenor il Cussegl federal duai l'agricultura svizra survegnir a partir dal 2026 fin il 2029 2,5% damain subvenziuns ch'ils ultims 4 onns. Concret propona el ina summa totala da var 13,68 milliardas francs.

Plinavant vuless il Cussegl federal transferir meds finanzials davent dals secturs da producziun e da vendita sco era pajaments directs ed als duvrar per meglieraziuns da structura e per la tratga da culturas e da sorts ch'èn resistentas a malsognas sco era per la protecziun persistenta da las plantas.

Sco quai ch'igl ha num en la communicaziun da la regenza grischuna refusian ins strictamain questa reducziun da las subvenziuns. Ils pajaments directs duain restar tar 11,2 milliardas francs ed ils daner per mesiras da promover la producziun tar 2,2 milliardas francs. L'augment da las mesiras per la promoziun da las basas da producziun a 674 milliuns francs beneventa ella. 

RTR novitads 09:00

Artitgels legids il pli savens