La Cuppa Spengler è mintg'onn ina festa da hockey. Igl è però era in turnier da prestige, nua ch'ins s'inscuntra davos las culissas. E tscherts osps èn pronts da pajar dapli ch'auters. Per quels, ed a chaschun dal giubileum da 100 onns Cuppa Spengler bajegian ils organisaturs in nov bajetg temporar per osps da VIP.
Entaifer curt temp duai il bajetg vegnir bajegià, amez l'enviern ed sin spazi stretg. Quai saja ina sfida. Per quai dovran l'interpresa da construcziun Uffer quadrins modulars or da lain. La fin duai dar in bajetg cun 110 meters lunghezza, cumplettamain isolà e stgaudà. Nagut duai regurdar ch'igl è mo in bajetg temporar.
Quant persistent è quai?
La lounge vegnia stgaudada a moda neutrala al CO2. E la laina vegn sulettamain or da la regiun da Tavau. Per il rest da l'onn metta l'interpresa Uffer a disposiziun ils passa 530 moduls ad auters eveniments en Svizra. E suenter la Cuppa Spengler po il WEF gist nizzegiar il bajetg per atgnas occurenzas.