Sut curaisma chapeschan ils catolics en emprima lingia ils 40 dis gigina ed abstinenza avant Pasca per sa preparar sin la levada da Cristus. Oriundamain gievi per far 40 dis gigina e betg mangiar charn.
Ozendi datti blers che na fan betg pli curaisma. Auters sa preparan bain anc sin la festa da Pasca, dentant betg pli sco pli baud cun far gigina e betg mangiar charn. Uschia datti intgins che desistan da tschigulatta e dultschs u ch'els na guardan betg televisiun e na dovran betg l'auto e medias.
audio
Bunura: Tge chapeschan spirituals sut curaisma
ord Actualitad dals 14.03.2019.
laschar ir. Durada: 3 minutas 32 Secundas.
I dat pia differentas metodas, co persunas fan curaisma – co persunas sa preparan sin Pasca. Uschia fan er persunas ch'èn engaschadas en la pastoraziun sin differentas modas e manieras curaisma:
Curaisma è per mai daventar liber per l'essenzial – da sa retegnair cun ils basegns e da guardar tge che fa propi senn da tgirar en la vita.
Curaisma n'è per mai betg exnum «mo» 40 dis far gigina. Igl è in temp da preparaziun sin Pasca ed ins po era sa preparar cun far insatge dapli e betg sulet cun desister dad insatge.
Curaisma è per mai insatge ch'ha oriundamain da far cun la natira: Quai era pli baud il temp ch'ins n'aveva naginas reservas. Ed uschia è quai er uss per mai il temp da giginar, da desister dad insatge ch'ins giauda uschiglio l'entir onn.
Curaisma è per mai in temp da prender peda per ins sez ed er reponderar l'atgna vita, dentant era in temp da renunziar ed in temp da sensibilisar sin carstgauns che vivan en miseria.
RR actualitad 08:00