Dapi 10 onns porschan els gia in curs da gastronomia. En quel emprendan ils participants co ch’ins lavura en ina cuschina svizra. Era vegnan tematisads usits, cultura e reglas svizras. Il curs ha lieu 3 giadas l’emna e quai durant 13 emnas. L’interess è fitg grond. 20 curs han gia gieu lieu ed 40 persunas en sin la glista da spetga.
“En Eritrea era cuschinar il pensum da la dunna”
Meseret deriva oriundamain da l’Eritea. Là era el biolog ad ina universitad. El ha dentant stuì fugir e viva ussa dapi 9 mais en Svizra. Ad el plaschi fitg bain qua. Ussa po el far part al 20avel curs da gastronomia per requirents d’asil. Ensemen cun 9 auters emprenda el da cuschinar, servir e da prender si empustaziuns. Cuschinar saja dentant insatge tut nov per el. En sia patria cuschinian las dunnas. En Svizra saja quai auter, e quai saja era bun uschia. Ad el plascha da cuschinar e dad uschè pudair lavurar.
80% schanza da success
Sco che la manadra Regina Cathomen di, hajans fatg bunas experientschas cun il curs. La preschientscha è tar bunamain 100% e quai malgrà ch’ils participants han da viagiar da Tavau e Laax fin a Cuira. Ulteriur sajan ils participants era fitg motivads, uschia che 80% dad els chattan suenter era ina plazza da lavur. Dentant na saja betg mo quai fitg positiv, mabain era il svilup da las persunas en la gruppa. Uschia dettia a l’entschatta mintgatant difficultads cun las differentas naziunalitads. Dentant emprendian els alura svelt ch’ins haja mo success en cuschina, sch’ins saja in team.