Durant las vacanzas da primavaira vegni scrit, giugà e filmà a Cuira. Ensemen cun Filmkids porscha il Teater Giuven Grischun in curs da film per uffants tranter 9 e 15 onns.
Durant in'emna han els la pussaivladad da producir sez in film curt. Da scriver l'istorgia fin a filmar e tagliar. In'aventura tut speziala, nua ch'els emprendan bler nov.
Cumenzà il project han els cun rimnar lur ideas. Quai han els fatg en duas gruppas, perquai ch'i dat la fin finala dus films curts. Suenter ch'els han mess ensemen tut lur ideas e discutà, è vegnì il proxim pass: scriver il script.
Jau n'hai anc mai vis ina camera sco en ils films.
Ina persuna, che sustegna els tar lur process, è Corina Liechti. Ella gida, nua ch'els dovran. Corina Liechti è pedagoga da teater e manadra dal Teater Giuven Grischun.
Il product final d'ina da las duas gruppas è in curt film da horror. El sa tracta da tschintg influenzers, che survegnan memia paucs clics e che tschertgan ina nova idea da video. Els van lura en ina chasa bandunada, nua ch'i vegn spert malempernaivel. In suenter l'auter svaneschan ils influenzers.
Tant davart l'istorgia sin palpiri. Ussa vai vi dad exercitar e giugar.
En il tschaler, nua ch'els vegnan a far lur film, na vulan els uss anc betg ir – pir cura ch'els cumenzan propi a filmar.
Acturas sin la plazza Arcas a Cuira
La segunda gruppa, che consista be da mattas, è sin la plazza Arcas a Cuira. Là filmeschan ellas ina scena. Sia istorgia na tracta betg da spierts u chasas bandunadas, mabain da l'amicizia e da problems dals giuvenils.
Las acturas han grond plaschair. Oravant tut han ellas plaschair da lur costums – giacca d'aur, chalzers traglischants e chalzers auts.
Per Julian Grünthal, in dals dus manaders, èsi adina bel da lavurar cun ils uffants e da producir in film cun els. Els emprendan anc bler dapli.
A mai vai per la lavur da team.
Per ils uffants è quai en mintga cas in'experientscha fitg bella ed interessanta. E tgi sa – forsa ch’in u ina dad els daventa ina giada in’actura, in um da camera u ina persuna che scriva cudeschs da film.
