Dumengia ils nov d'october han gieu lieu las ultimas cursas da chavals internaziunalas da quest onn a Maiavilla. En il center n'eran dentant betg las cursas sezzas, ma in midament da reglas ed ina commembra da la suprastanza.
Victur profita da midament da reglas
Retschertgas dal schurnal regiunal dad SRF mussan ch'il chaval victur dal Premi dal Grischun ha be pudì ir a la partenza pervi dad ina midada da reglas a curta vista. Picant: la commembra da la suprastanza, ch'era responsabla per quest midament da reglas in'emna avant la cursa, saja stada participada vi da l'equipa da chavals dal victur. Pervi da quest midament da reglas hajan plirs trenaders decis da retrair lur chavals da la cursa, conferma il club da cursa Maiavilla envers il schurnal regiunal dad SRF.
La suprastanza dal Club da cursa Maiavilla ha entant communitgà che la persuna responsabla per la modificaziun da las reglas sa retira da la suprastanza e dal comité d'organisaziun. Quai saja en l'interess dal club.
