Barbara Janom Steiner e Giovanni Jochum duain represchentar ils interess dal Grischun en il concern d'energia Repower. La regenza n’ha betg dà enconuschent sezza sias nominaziuns. Ils dus nums èn vegnids publitgads la mesemna en il Fegl da commerzi svizzer. La radunanza generala da la Repower sto anc approvar ils dus candidats per il cussegl administrativ ils 17 da matg 2023.
Barbara Janom Steiner (anteriura PBD) è stada en la regenza grischuna dal 2008 fin il 2018 e presidiescha la Banca naziunala svizra. Giovanni Jochum (PLD) è president communal da Poschiavo ed ha lavurà en pliras funcziuns directivas da la Repower.
Mandats lucrativs
Sco cumproprietari da la Repower po il chantun Grischun occupar dus sezs en il cussegl administrativ. Tgi che represchenta il Grischun po la regenza grischuna decider.
Sin dumonda da la FMR na vuleva la cussegliera guvernativa Carmelia Maissen (AdC) betg declerar co ch'ils e las candidatas vegnan tschernidas. I valian ils criteris ch'èn descrits en l'inserat dal schaner. Ils mandats en il cussegl administrativ èn lucrativs, e portan tenor il rapport da gestiun da la Repower mintg'onn 90'000 francs ad il u la cussegliera administrativa.
Per ils dus posts libers en il cussegl d'administraziun da la Repower èn s'annunziads var 90 candidats e canditatas tar il chantun.
