Siglir tar il cuntegn

Header

cuntegn

Cussegl grond Dapli sustegn per la tgira d'uffants

Las deputadas ed ils deputads dal Cussegl grond han revidì totalmain la lescha da la promoziun da la tgira d'uffants cumplementara. Famiglias survegnan cun quella en il futur dapli sustegn finanzial sch'ellas tramettan lur uffants per exempel en ina canorta. En pli survegnan famiglias cun pitschnas entradas dapli subvenziuns che famiglias cun entradas autas. Uschia duain tut ils uffants pudair profitar d'ina tgira, betg be quels da famiglias cun dapli daners. «Oz ston famiglias pajar minimum 40% dals custs sezzas, quai è anc adina damemia per bleras famiglias», di il president da la regenza Marcus Caduff ed agiunta: «En il futur quintain nus che nus pudain subvenziunar per talas famiglias fin 90% dals custs».

audio
Tgira d'uffants: Intervista cun Marcus Caduff
ord Actualitad dals 06.12.2022. Maletg: MAD
laschar ir. Durada: 3 minutas 18 Secundas.

Ed er per las canortas sezzas duai vegnir pli simpel da lavurar – las tariffas na duain betg pli esser liadas vi da las entradas dals geniturs, uschia che las canortas han dapli segirezza per planisar. Quai duai lura er esser pli tgunsch pussaivel da porscher ina tgira cumplementara er en las regiuns nua che bleras persunas cun pli pitschnas entradas vivan.

Tgi surpiglia ils custs?

Ils custs supplementars che la nova lescha chaschuna vegnan repartids egualmain sin il chantun e sin las vischnancas. En cifras munta la nova lescha che ils custs vegnan da nov ad esser tranter 12 e 16 milliuns francs empè dals 8 milliuns francs sco enfin uss. Il quint exact sto dentant anc vegnir fatg cun las differentas midadas che las deputadas ed ils deputads han decidì.

video
Cussegl grond approva budget e dat dapli daners per canortas
Or da Telesguard dals 06.12.2022.
laschar ir. Durada: 2 minutas 38 Secundas.

Mancanza da persunal sco motor

Er sche bleras famiglias giavischassan gia daditg dapli sustegn per la tgira è il tema cunzunt vegnì discussiunà en il Cussegl grond en connex cun la mancanza da persunal dal fatg che tutga il chantun en il futur. Ina metoda per cumbatter la mancanza da persunal saja numnadamain da procurar per meglras structuras da tgira per uffants per che dapli dunnas possian puspè lavurar. Cun dapli canortas duai il chantun er vegnir pli attractiv per carmalar novas abitantas e abitants en il chantun.

La lescha revidida duai probablamain ir en vigur sin l'onn 2024.

Artitgels legids il pli savens