La deponia procura gia dapi onns per discussiuns, pervia dal privel ch’ella ha eventualmain per l'aua sutterrana e la fin finala er per l'aua da baiver. Punct da discussiun è stà spezialmain «Triclolrethylen» – ina materia che vegniva pli baud savens duvrada en l'industria, spezialmain en quella da metal. E questa materia chaschuna cancer, ha Anita Mazzetta da la partida verda ditg durant la debatta.
Ina reacziun è sinaquai vegnida da Christian Morf da la PPS, che lavura dapi 47 onns tar l'Ems-Chemie. Las mesiraziuns dals ultims onns mussian che la concentraziun da «Triclolrethylen» saja 10 giadas pli bassa che la limita lubida en l'aua da baiver. I na saja perquai betg da far polemica.
Ins po anc ditg discutar
La liberaldemocrata Christine Kocher ha ditg ch'ins pudess anc ditg discutar sche la concentraziun è memia auta u sch'i saja propi in privel per la populaziun. E perquai ha ella pretendì da simplamain sanar questa deponia per ch'ins possia serrar quest chapitel.
Uschè simpel na saja quai dentant betg, ha il cusseglier guvernativ responsabel – Jon Domenic Parolini – agiuntà. El ha, tranter auter, ditg ch'i saja da sa tegnair vi da la lescha federala. Quella di che las mesiraziuns ston surpassar ina tscherta valur per ch'i possia vegnir sanà.
Probabel è ch'il Cussegl grond n'ha betg discutà la davosa giada davart la veglia deponia Rusna da Furns a Domat e la materia «Triclolrethylen».