Il nov Cussegl grond è pli feminin e pli giuven. Sper quai èn la dretga e la sanestra vegnidas pli fermas. Liberaldemocrats ed Allianza dal Center han pers pussanza. Quai mussa la statistica. Suenter mo ina sessiun èsi grev da far in'analisa. Anc èn tuts in zic vi da sa chattar, ed ils 54 chaus novs ston er anc emprender co il manaschi dal Cussegl grond funcziuna precis cun sias reglas.
Betg pli uschè strict sco pli baud
Cumpareglià cun pli baud datti dentant pli paucas reglas. Avant onns valeva numnadamain anc che novizas e novizs na duain l'emprima sessiun anc betg prender il pled, e mo tedlar tiers. Quai èn tempi passati! Bleras novas vuschs han ins gia udì quests dis en la sala dal Cussegl grond. Ils novs han dà gas. Cunzunt la nova fracziun Verdliberala è stada activa ed ha adina puspè prendì il pled. Dentant er novizas e novizs d'autras fracziuns èn stads d'udir, ed han per part era gia inoltrà dumondas e fatg propostas per midadas tar leschas en revisiun.
PPS en l'opposiziun
La partida populara aveva gia ordavant annunzià da vulair ir en l'opposiziun. In'opposiziun constructiva, hai gì num. Cun vulair renviar l'entira lescha da persunal e dar enavos la balla a la regenza – n'ha ella dentant gì nagin success, ed insumma nagin sustegn. Anzi, las autras partidas han crititgà l'agir, che quai na saja in bun start per la nova legislatura. Igl è da guardar co quai sa sviluppà anc ils proxims quatter onns da la legislatura. Senza allianzas na po la PPS numnadamain muventar pauc.
Tuttina vai er a la sanestra cun PS e Verda – er ella na po betg muventar bler senza sustegn d'autras partidas. Quai è sa mussà tranter auter tar la revisiun da la lescha davart il traffic public, nua che la sanestra avess gugent anc gì in zic dapli sustegn finanzial dal chantun. Igl è uss da guardar co las allianzas sa furman en il decurs da la legislatura.
PLD ed AdC pli ruassaivel – PVL ha dà gas
Ils liberaldemocrats e l'Allianza dal Center han entant pers pussanza, l'AdC prest 20 sezs ed ins senta ch'i ha dà pli paucs votums or dal mez. E gist tar la PLD hai inqual vusch ferventa pli pauc, uschia ch'igl è er qua daventà pli ruassaivel.
Auter vesi or tar ils Verdliberals – da nov han els set sezs empè da trais ed uschia èn els daventads ina fracziun. Ina che dat gas. Igl è stà d'udir blers votums, saja quai tar il traffic public, l'energia u la lescha da persunal.
Opticamain pli giagl
Er opticamain crodan en egl midadas en il Cussegl grond. Ins po vesair ch'igl ha in zic dapli dunnas en il parlament, quai vi da la vestgadira pli giaglia tranter ils – per gronda part – vestgids stgirs dals umens. Gist la vart sanestra croda en egl qua cun bleras colurs.
