Gist quatter dumondas ed ina resoluziun en il Cussegl grond han pretendì che la Viafier retica repondereschia ses pass da reducir la purschida. La resoluziun pretenda che la Retica e la regenza procuran che las midadas vegnan surlavuradas uschia ch'ellas impedeschan uschè pauc sco pussaivel persunas ch'èn dependentas dal tren, sco pendularias e scolars.
Suenter lungas discussiuns ha il Cussegl grond lura surdà a moda adattada ina resoluziun – quai cun 51 vuschs Gea, 49 Na e 10 abstenziuns. Ina resoluziun è in instrument politic che vala sco signal per la regenza. Ella n'ha dentant betg ina funcziun lianta.
Deputadas e deputads han surtut crititgà la communicaziun e ch'ins n'haja betg infurmà ad ura las regiuns.
Chapientscha e veglia da meglierar
Sper tut la critica hai dentant er dà chapientscha per las decisiuns. Ins stoppia proteger la sanadad dal persunal e che la decisiun da la Retica na saja betg ina decisiun da levsenn. Sch'ins haja stretgas da persunal mainia strusch ina via sper la reducziun da servetsch ora.
Er la cussegliera guvernativa responsabla per il traffic public, Carmelia Maissen, ha chapientscha per la malcuntentientscha da passagieras e da la politica. Ella crititgescha er che la communicaziun da la Viafier retica saja stada tut auter ch'ideala. Ins saja dentant en contact cun la Viafier retica per tut tenor anc meglierar ils plans previs.
Il chantun n'è betg intgantà, ma ha chapientscha per las midadas ch'èn necessarias per proteger la sanadad dal persunal.
Concret giaja per l'ina per bajegiar giu sururas en la stagiun laterala e per l'autra per meglierar il plan previs e tut tenor tuttina avair dapli colliaziuns durant la stad, cura ch'i haja dapli giasts. Quai ha declerà Carmelia Maissen en il Cussegl grond.
