Malgrà che cassas da malsauns e sbassar premias èn anc stadas la dumengia in grond tema cun duas iniziativas federalas che han fatg naufragi, è questa tematica betg stada fitg preschenta durant la sessiun dal Cussegl Grond.Nus avain tuttina sentì il puls tar las partidas. Ed i è cler che questa tematica vegn ad occupar durant las proximas sessiuns il parlament grischun.
Cun 110 da 111 vuschs valaivlas ha il Cussegl grond elegì Marcus Caduff sco president da la regenza grischuna per l'onn 2025. Il politicher da l'Allianza dal Center succeda a ses collega da partida Jon Domenic Parolini ch'è anc fin da l'onn president. Gia il 2021 è Marcus Caduff stà president da la regenza grischuna. Sco vicepresident è Martin Bühler vegnì elegì.
Ulteriurs 20 milliuns per Green Deal
Il Cussegl grond ha ditg gea ad in credit supplementar da 20 milliuns francs per il plan d'acziun Green Deal. Il Green Deal grischun cumpiglia 27 mesiras per sbassar emissiuns e per far frunt a la midada dal clima. Ils daners duain tranter auter vegnir duvrads per sanar bajetgs ubain per promover il traffic public.
L’october 2021 aveva il Cussegl grond gia ditg gea ad in credit da 67 milliuns francs per l'emprima etappa dal green deal fin il 2026 . Encunter il credit supplementar è sulettamain la PPS stada. Pervia da la gronda dumonda vegnan ils meds ad esser duvrads si sin la fin da l'onn. La segunda etappa dal Green Deal n'è dentant anc betg pronta.
La lescha davart las scolas autas e la perscrutaziun è revedida
Mardi avantmezdi ha il Cussegl grond per l'ina mess sut tetg il quint 2023 e per l'autra er la lescha davart las scolas autas e la perscrutaziun. La revisiun ch'il Cussegl grond ha fatg è stada necessaria per meglierar las cundiziuns da las duas scolas autas en il Grischun. La scol'auta da pedagogia dal Grischun sco er la FHGR, la scol'auta spezialisada dal Grischun duain esser prontas per il futur, perquai survegnan ellas uss dapli pussaivladads da s'organisar e decider sezzas davart lur portfolio, quai dentant cun resguardar lur profils. Vul dir; tar la scol'auta da pedagogia stat vinavant la scolaziun da magistraglia en il center e tar la FHGR la tecnica e l'economia. Sper quai duai en il futur er esser pussaivel da per exempel porscher in studi da tgira a la FHGR. Ultra da quai èsi uss er reglà en la lescha che titels che studentas e students survegnan a la fin dal studi èn protegids. La lescha revidida duai ir en vigur il cumenzament dal 2025.
Sport da la bun'ura
Cumenzà ha il segund di per radund 30 deputadas e deputads cun sport, pli exact cun far biatlon en la halla da gimnastica da la chasa da scola Quader. Gia a las 06:30 èn politichers da tuttas partidas s'entupads. Ensemen cun l'anteriura biatleta Selina Gasparin han els fatg in pitschen fufragnadi da sajetar cun la buis da biatlon.
Per il president dal Cussegl grond, Franz Sepp Caluori èsi cler che quels che han dumagnà oz baud ord letg per far sport, èn uss pli alerts per las debattas.
En la sala dal Cussegl grond ha il parlament lura cuntinuà cun la debatta davart il quint chantunal 2023 ch'aveva cumenzà il glindesdi. In quint che ha puspè nudà in gudogn – empè dal deficit budgetà. Il quint è vegnì approvà unaninamein.
Emprem di da la sessiun da stad
Il president dal Cussegl grond Franz Sepp Caluori ha avert la sessiun dal zercladur. En ses pled d'avertura ha el fatg attent sin l'inclusiun da persunas cun impediment. Il pled inclusiun saja dapertut – ma el metta er en dumonda sche la politica fetschia avunda per dar er a persunas cun impediment ils medems dretgs e las medemas schanzas. Ses fazit: La politica è sin la dretga via, sto dentant agir pli spert, pli consequent e pli conscient. En quest senn ha el avert la sessiun.