Siglir tar il cuntegn

Header

cuntegn

Cussegl grond Revisiun parziala da la lescha da la cassa da pensiun è sut tetg

Il Cussegl grond ha cumenzà la debatta davart la revisiun parziala da la lescha davart la cassa da pensiun dal Grischun. Las opiniuns van dentant dapart.

La revisiun parziala da la lescha davart la cassa da pensiun dal Grischun è sut tetg. Cun 105 tar ina vusch ha il Cussegl Grond ditg Gea. La revisiun è necessaria per che la cassa da pensiun chantunala restia cumpetitiva cumpareglià cun autras cassas da pensiun. Uschia èn tranter auter las contribuziuns da spargn vegnidas auzadas. Sper quai è er la pensiun anticipada vegnida adattada. En il futur èsi pir pussaivel da retrair ina renta transitorica davent da la vegliadetgna da 62 onns, fin uss eri pussaivel gia davent da 60 onns. La sanestra sco er la regenza fissan gugent restads tar 60 onns, er avessan els gugent auzà in zic pli fitg las contribuziuns da spargn. La maioritad burgaisa dal Cussegl grond ha dentant decidì auter.

Gia en la debatta d'entrada èn las opiniuns da deputadas e deputads idas dapart. Blers eran da l'avis ch'i dovria la revisiun per far pli cumpetitiva la cassa da pensiun chantunala. Auters han discurrì d'ina varianta da luxus che fetschia quasi memia attractiv il maun public sco patrun. Quai haja lura l'effect che blers veglian midar dal sectur privat tar il maun public. Cunzunt la sanestra è dentant da l'avis che la revisiun giaja bain en la dretga direcziun, dentant ch'il pass saja memia pitschen per propi daventar cumpetitiv. Er sch'ins fetschia la revisiun sco previs saja la cassa da pensiun dal chantun plitost davos en a cassas cumparegliablas d'auters chantuns.

Nairas uras da far ina revisiun

Il cusseglier guvernativ responsabel Christian Rathgeb (PLD) ha dentant punctuà pliras giadas ch'i saja impurtant da far la revisiun. Ins n’haja memia ditg fatg nagut e stoppia uss far in pass pli grond per restar cumpetitiv ed attractiv. Discurrer d'ina varianta da luxus saja absurd.

La pli gronda cassa da pensiun dal Grischun

En il rom da la revisiun parziala da la lescha davart la cassa da pensiun dal Grischun duain tranter auter las contribuziuns da spargn da persunas ch'èn segiradas sur la cassa da pensiun dal chantun vegnir auzadas. La finamira da la revisiun è da restar in patrun cumpetitiv. Las circumstanzas sajan sa midadas il decurs dals onns, ils tschains extrem bass ed ils segirads vegnan pli vegls e retiran pli ditg daners. Cun in chapital da passa 3,3 milliardas francs è la cassa da pensiun dal Grischun la pli gronda en il Grischun cun passa 12'000 persunas segiradas u che retiran ina pensiun – tar quels tutgan cunzunt collavuraturas e collavuraturs dal chantun ed er da bleras vischnancas.

audio
Per tedlar curt e cumpact
00:53 min, Novitads dals 26.08.2021.
laschar ir. Durada: 00:53 minutas.

RTR novitads 06:00

Artitgels legids il pli savens

Scrollar a sanestra Scrollar a dretga