Per mai è quai propi il punct culminant da mia via politica.
Martin Candinas era vegnì nominà avant in'emna da la fracziun da mez sco candidat. Tenor turnus po quella metter il 2023 il president dal Cussegl naziunal.
Cun il Sursilvan vegn suenter 35 onns puspè in rumantsch a presidiar il Cussegl naziunal. Sias qualitads per il post vesa Candinas en ses 9 onns d'experientscha ch'el sesa entant en il parlament federal a Berna. Plinavant haja el ina buna rait da contact ed er il manar tutgia gia pli ditg tar ses mintgadi, ha el ditg envers RTR.
Andreas Aebi (PPS) è il nov president dal Cussegl naziunal
Per il proxim onn è il politicher bernais da la PPS Andreas Aebi (62) vegnì elegì sco il pli aut svizzer, quai cun 178 da 183 vuschs valaivlas. Aebi è dasper politicher er pur, aucziunari e possessur d'in biro da viadi.
Alex Kuprecht (PPS) presidiescha il Cussegl dals chantuns
Il Cussegl dals chantuns vegn presidià l'auter onn dad Alex Kuprecht (PPS). Il politicher da Sviz è vegnì elegì cun 43 da 43 vuschs valaivlas. Kuprecht sesa dapi 17 onns en la chombra pitschna.