«Sche la glieud fiss vegnida pli baud... sche nus avessan savì ordavant!» – tals patratgs enconuscha Susanna Gadient, manadra da l'Uffizi dal servetsch social. Tenor sia experientscha vai magari ditg fin ch'insatgi survegn propi agid e di insatge, cura ch'in uffant vegn malduvrà.
Per midar quai e promover che la glieud vegnia pli spert en moviment, haja quai duvrà quest nov post da cussegliaziun, declera Susanna Gadient. «Fin ussa avevan nus savens il sentiment che la glieud pensa, ch'ella na veglia betg sa maschadar en», di ella. «Els pensan, che l'uffizi sappia lura tut, u ch'i capita gist insatge.» La cussegliaziun è anonima, gratuita e sperta – quai è fitg impurtant ad ella.
Sche la cussegliaziun è anonima, na ston ins betg dir il num e betg avair tema, ch'i capitia insatge – e tuttina survegn ins agid.
Concretamain vul il nov post render attent trenadras da sport, magisters, tgirunzas ed assistents da canortas – pia persunas che han da far cun uffants e giuvenils e che pudessan vesair ils indizis d'abus u da negligientscha. Tals indizis pon esser, sch'ils uffants han fadia da sa concentrar, èn cronicamain stanchels u trists u emblidan bler, u sch'ils uffants curran davent da chasa, consumeschan drogas u èn violents envers auters.
Ina persuna che senta quai, chatta sustegn tar il nov post da cussegliaziun. Alura po ella telefonar directamain a la cussegliaziun spezialisada per la protecziun dals uffants, nua ch'in team d'experts e d'expertas gida a valitar la situaziun, e declera ils proxims pass, ch'ella pudess interprender.
U in'autra varianta, avant che telefonar: valitar en in emprim pass sez la situaziun, cun l'uschenumnà cumpass, ina glista cun segns, ch'in uffant pudess esser periclità. Questa glista pon ins chargiar giu da la pagina dal chantun Grischun e lura ir tras ils puncts. Uschia possia la persuna sezza valitar la situaziun e decider sch'ella veglia contactar in'autoritad u il post da cussegliaziun.
Blers pensan: jau na less betg ma maschadar en. Jau na vi betg far problems ad insatgi. Jau spetg pli gugent anc in zic. Quai vulain nus midar.
La speranza da Susanna Gadient è, che la nova purschida vegnia nizzegiada – e quai gia fitg baud, il mument ch'ina persuna ha in sentiment mal.