Tenor la Viafier retica èn datas da persunas che han cumprà bigliets sin via digitala en la butia online dal tren d'autos Vereina pertutgadas da la cyberattatga da la mesemna saira. Ina malware saja vegnida installada. Pertutgadas sajan datas da persunas sco nums, pled-clav ed adressas. Datas da cartas da credit na sajan però betg pertutgadas, perquai che lezzas sajan sin in auter sistem. Il cas saja vegnì annunzià tar l'Uffizi federal per segirezza digitala sco era tar autoritads da la persecuziun penala.
Tge munta quai per utilisaders ed utilisadras. Nus avain dumandà noss responsabel per la sigerezza digitala en chasa RTR Fabio Pally.
RTR: Tgi è en quest cas tut pertutgà?
Fabio Pally: La Viafier retica ha in sistem separà per il tren da transports d'autos Veraina. Mo il shop online è pertutgà. Las cassas avant lieu n'èn betg pertutgadas. Quai munta: sch'ins ha cumprà bigliets online, lura è la schanza gronda ch'ins è pertutgà da questa cyberattatga.
Tge èsi sch'ins ha utilisà cartas da credit en il shop online?
Cartas da credit n’èn tenor stan actual betg pertutgadas. Las infos da cartas da credit na vegnan tenor la Viafier retica betg arcunadas en il shop, ed il pajament vegn exequì sur in sistem extern.
Tge pon ils hackers far cun las infurmaziuns?
Sch'els chattan la adressa da mail, lura han ils hackers la pussaivladad da trametter mails da phishing. Quai èn mails cun cuntegns inventads, cun infurmaziuns faussas che duain far la parita dad esser mails uffizials. Quels animeschan il bler da smatgar in link dubius. Tar l'adressa poi esser che quels tramettan quints fictivs. Là ston ins simplamain esser attent.
E tar pleds-clav: ston utilisaders dal shop avair tema?
Quai dependa dal pled-clav ch'ins dovra. Sche l’utilisader dovra dapertut il medem pled-clav, lura è il privel fitg grond. Vul dir: immediat midar il pled-clav. En general duain ins esser pli precaut cun pleds-clav. Utilisar bustabs, cifras e segns. Tge che po gidar è in uschenumnà «password manager». Quai è in program che creescha ed arcunescha pleds-clav pli cumplex - survesaivel ed en in lieu.