Nov uffants tranter 7 e 14 onns èn partids en duas gruppas e scrivan mintgamai in’istorgia cun dialogs. L’emprim di han els dastgà fufragnar en la biblioteca, per alura decider a moda democratica, tge dus cudeschs che vegnan duvrads sco basa per lur gieus auditivs.
Istorgias d’aventuras
Omaduas istorgias tractan d’uffants che ston la fin finala schliar in misteri, sco detectivs e detectivas. Il bel saja da crear ord in cudesch lungurus ina dretga istorgia d’aventuras, uschia in dals participants.
Per tadlar ils gieus auditivs
Lavurar en gruppa è ina sfida
Natiralmain dettia quai en mintga gruppa uffants schenads e da quels vivs, cun massa ideas. Dentant la fin finala dettia quai tuttina in equiliber, uschia Anna Fierz da klipp+klang, che maina il curs.
Dentant cura che nus registrain, cura che mintgin ha sia figura e sia rolla, lura prospereschan quels e quellas ch’ins aveva il sentiment ch’els giaschian suten.
En emprima lingia duess il curs far plaschair als uffants, dentant vegnia era rinforzà intginas cumpetenzas socialas, uschè Fierz.
Scriver atgnas istorgias è cool
Impunder trais dis à 6 uras, e quai en il temp da vacanzas, quai fa senn, uschè ils participants e las participantas. Inventar istorgias e far insatge extraordinari en las vacanzas, quai saja mega.
Ils gieus auditivs vegnan emess
Ina giada che las istorgias èn scrittas, èsi da registrar ellas. La finamira è d’avair dus gieus auditivs da circa 10 minutas che vegnan lura emess al radio Kanal K en l’Argovia.