En la Chasa da dunnas grischuna a Cuira han l'onn passà tantas dunnas ed uffants chattà albiert sco anc mai. Sco quai che la fundaziun da la chasa scriva en ses rapport annual, haja la chasa dà suttetg a 30 dunnas e 27 uffants. L'onn avant – il 2015 – ch’era gia stà in onn da record, aveva la chasa anc dà albiert a 25 dunnas e 26 uffants.
Quellas cifras mussian – che la Chasa da dunnas saja vinavant necessaria. Tant pli ch'ils cas da violenza a chasa s'augmentia. L'onn 2016 èn vegnids registrads en il chantun Grischun 259 cas da violenza a chasa, vul dir 75 cas dapli che l'onn avant.
Emprima chasa da dunnas senza barrieras
In grond project da la Chasa da dunnas è stà da realisar l’emprima Chasa da dunnas en Svizra senza barrieras. La Chasa è vegnida renovada per far ella accessibla a persunas cun impediments corporals. Las mesiras cumpiglian dentant era la tgira da persunas cun impediment e la pagina-web che po nov vegnir duvrada da persunas tschorvas ni surdas.
Quint serra cun deficit
La perdita da manaschi da la Chasa da dunnas munta a radund 190’000 francs. La Fundaziun Chasa da dunnas grischuna surpiglia suletta quest deficit. Grazia al sustegn dal chantun, da vischnancas, d’uniuns da dunnas, da las baselgias, da differentas firmas e da persunas privatas èsi pussibel da manar vinavant la Chasa da dunnas.
Cussegliaziun era per terzas persunas
La Chasa da dunnas fa era attent ch’ella na dat betg sulet albiert a dunnas ed uffants ch’èn unfrendas da violenza. Ina gronda part da la lavur cumpiglia era la cussegliaziun da persunas pertutgadas da violenza al telefon. Ultra da quai cusseglia il persunal da la chasa era terzas persunas ch’èn savens sulettas cun lur observaziuns.
RR novitads 11:00