L’emprim da mars èsi mintgamai uschè lunsch: Il Chalandamarz lascha siglir ils cors da pign e grond en l’Engiadina ed en il Grischun Central. Ch'i dat dentant era in «Calondamars» en Surselva n'è betg uschè enconuschent.
L’usit Engiadinais e Surmiran sco tal, ils uffants cun lur plumpas e stgellas che chaminan enturn il bigl è renumà lunsch enturn pervia dil cudesch Uorsin d'Aluis Carigiet e Selina Chönz da l’onn 1945.
Muntada antica
Tge che Chalandamarz ni Calondamars munta precis, n'è dentant betg enconuschent dapertut en il chantun Grischun.
Il term sa basa sin ils pleds latins «calendae» e «martii» e munta en la translaziun libra: I‘emprim di u ils emprims trais dis dal mais mars. Quai era gia tar ils Romans en l’antica uschia. Dentant era lura il Chalandamarz l'emprim di da l’onn, pertge l’onn cumenzava cun il mars. Quai è sa midà pass per pass dapi il 16avel tschientaner e l’introducziun dal chalender gregorian che nus enconuschain oz.
