Siglir tar il cuntegn

Header

cuntegn

Dapli incumbensas Pumpiers salvan bainbaud er or da l'aua

Las vischnancas han da garantir tut il salvament da persunas sin lur intschess. La gruppa d’intervenziun è per regla ils pumpiers, en cas spezials ed alpins era il salvament da muntogna. Era part da quellas incumbensas è il salvament or da l’aua. Fin uss na datti nagins curs u trenaments per tals accidents per ils pumpiers. Quai sa mida quest onn ed ils emprims pumpiers grischuns vegnan scolads quest atun, declera il pli aut pumpier grischun Conradin Caduff.

audio
Pumpiers grischuns emprendan il salvament or da l'aua
ord Actualitad dals 06.04.2023. Maletg: RTR
laschar ir. Durada: 3 minutas 1 Secunda.

Salvament da la riva

La prioritad principala tar tut las acziuns dals pumpiers è la segirtad da quels. Era tar il salvament or da l’aua. Perquai na vegnan ils pumpiers betg ad ir en l’aua per far in salvament, mabain agir tut tenor basegn nà da la riva, declera Conradin Caduff. Natiralmain basegna quai alura er in equipament adattà.

Planisà è che mintgamai dus represchentants dals corps da pumpiers fan in curs da scolaziun ed alura vegn scolà durant in exercizi per onn il corps, declera Caduff. Era els stoppian l’emprim mirar co tut funcziuna, tuttina possian els sa referir sin las grondas experientschas dals corps da pumpiers en l’Engiadina Ota nua ch’in tal salvament vegn gia fatg.

Custs survesaivels

Las investiziuns en material ch’ils corps da pumpiers han da far restan en ina dimensiun survesaivla da maximal 10’000 francs, di Conradin Caduff. Vitiers vegnia alura anc las uras supplementaras dals pumpiers per ils exercizis. La finamira è da dar als pumpiers la savida necessaria ed il material per insumma pudair ademplir l’incumbensa. Tar il salvament or da l’aua dettia quai in impurtant factur e quai è il temp, pli spert al lieu e pli grondas schanzas da liberar las persunas.

Ma els na vegnian betg a stuair ademplir salvaments or da l’aua nua che la purschida è professiunala, sco per exempel en la Ruinaulta. Mintga purschider da sport sin l’aua professiunal è era responsabel per il salvament e betg ils pumpiers, declera Conradin Caduff. La finamira è d’equipar e scolar tut ils corps da pumpiers pertutgads sin la fin dal 2025.

RTR actualitad 12:00

Artitgels legids il pli savens