En il Grischun han pli paucas persunas fatg vacanzas la stad 2023, ch'anc avant in onn. Quai mussan las cifras da pernottaziuns da l'Uffizi chantunal d'economia e turissem, per la stagiun dal matg fin l'october. Entaifer dal chantun datti dentant grondas differenzas. Uschia han Cuira, la regiun da Valposchiavo, Viamala ed il Signuradi gì in plus da passa 2%. Mustér Sedrun ha pers il pli bler, cumpareglià cun il 2022. Là datti in minus da 13,7%. Passa 10% minus han era fatg Flem Laax e Bravuogn Filisur.
Nov record tar pernottaziuns en Svizra
La hotellaria svizra ha gì dal matg fin a l'october 23,9 milliuns pernottaziuns, quai munta ad in plus da 6,3% – in nov record. Oravant tut ils osps or da l'exteriur han procurà per quest bun resultat. Igl ha dà 12,4 milliuns pernottaziuns, quai è in plus da 17,2%, cumpareglià cun la medema perioda da temp dal davos onn. Il pli grond plus hai dà là tar osps da l'Asia. Il 2023 han prest dubel uschè bleras persunas da l'Asia visità la Svizra. Il dumber da pernottaziuns da Svizzers e Svizras è percunter sa reducì per 3,4%.
