Persunas indigenas na chattan betg pli spazi d'abitar pajabel, perquai che circa 60% da las abitaziuns valan a Tavau sco abitaziuns secundaras. Tenor Philipp Wilhelm, landamma da Tavau, s'augmenta quest dumber vinavant, era sch'i dat gia ina lescha naziunala davart quest tema. Quai sco el di vers il schurnal regiunal dad SRF
Sch'ins va tras Tavau ves'ins dapertut exempels pertge che la regulaziun fiss fitg impurtanta. Dapertut datti anteriuras chasas d'abitar, nua ch'i dat novas abitaziuns secundaras.
La lescha naziunala d'abitaziuns secundaras prescriva che, sch'ina vischnanca ha ina quota d'abitaziuns secundaras da passa 20%, na dastgan betg pli vegnir lubidas novas abitaziuns secundaras. Vinavant lubida è dentant anc la midada d'utilisaziun dad uschenumnadas «abitaziuns veglias», vul dir abitaziuns ch'eran permessas legalmain sco emprima abitaziun avant ils 11 da mars 2012.
Nova lescha duai gidar
Quai vul la suprastanza communala midar. Ina lescha communala per rinforzar questas reglas è vegnida elavurada e sa chatta il mument tar il chantun per examinar. Perquai che la suprastanza communala ha dentant tema ch'i vegnia midà memia bleras abitaziuns enfin che questa lescha entra en vigur, ha ella prendì ina mesira provisorica.
Fin che la lescha è tras tut las instanzas, procura ussa ina zona da planisaziun ch'i dettia dapli emprimas abitaziuns. La zona da planisaziun prescriva che per exempel ina chasa da pliras famiglias na possia betg pli vegnir transfurmada cumplettamain en abitaziuns secundaras. Tgi che vul ussa far quai, na dastga betg transfurmar ina part da las abitaziuns ed i ston restar emprimas abitaziuns.
Zona da planisaziun procura per discussiuns
La zona da planisaziun procura però per discussiuns. Damian Markutt da la Partida liberaldemocrata da Tavau na vul nagins tals scumonds u regulaziuns. Il mainafatschenta d'ina interpresa d'immobiglias punctuescha ch'ins stoppia vinavant construir abitaziuns, sco quai che la strategia dal spazi d'abitar saja prevesida.
Er il landamma Philipp Wilhelm è da l'avis ch'i stoppia vegnir bajegià dapli. La finamira saja dentant d'avair uschè bleras emprimas abitaziuns sco pussaivel e vitiers tutgia era da salvar las emprimas abitaziuns d'enfin uss.
La lescha communala duess vegnir examinada anc quest onn dal chantun. Fin che la lescha saja dentant tras tut las instanzas, possia quai durar fin dus onns, manegia Philipp Wilhelm vinavant vers il schurnal regiunal da SRF. Perquai valia la zona da planisaziun cun las prescripziuns medemamain per dus onns.