Segl, Soglio e Bondo èn sper Berlin e Paris er culissa per il film «Als Hitler das rosa Kaninchen stahl». Il film tenor il roman autobiografic da Judith Kerr mussa l'istorgia da la famiglia dad Anna ch'ha stuì fugir dals nazis da Berlin en Svizra, pli tard lura er a Paris. Anna ch'ha 9 onns ha laschà tut a chasa, uschia er ses cunigl rosa charezzà. Il film raquinta la tematica pesanta dals nazis e Hitler da moda lucca ed umoristica ord la perspectiva d'ina mattatscha.
Culissa bregagliotta
Per il temp en Svizra han ils responsabels decidì da giugar a Segl, a Soglio ed a Bondo. Quai er per illustrar l'idilla e la neutralitad svizra durant il temp da la segunda guerra mundiala. Las registraziuns da la stad 2018 en Bregaglia èn stadas colliadas cun sfidas pervia da las malsegirtads enturn il Piz Cengalo. Perquai han ils responsabels er gì plans en cas ch'i vess dà ina situaziun da privel.
Sustegn finanzial ha il film tranter auter survegnì dal chantun Grischun e da la SRG SSR.
RTR actualitad 12:00