Bravuogn
Bravuogn ha elegì sia suprastanza. Rico Florinett e Johannes Schmid èn vegnids reelegids per in'ulteriura perioda d'uffizi. Da nov en suprastanza èn Madleina Schutz Madeira Afonso e Jana Cavelti. Il president communal Luzi Schutz era gia vegnì elegì mesemna passada.
Arosa
Arosa refusa il project da trais chasas cun novas abitaziuns sin la Wätterweid. Entant ch'il parlament aveva anc ditg gea cun 12 encunter 1 vusch, ha il suveran refusà il credit da 21,5 milliuns francs persuenter. Quai cun bun 54% na. Auter tar il credit da bun 20 milliuns francs per la renovaziun totala da l'ovra electrica Lüen. Lez credit è vegnì approvà cun 92 pertschient da las vuschs.
Vaz/Obervaz
Vaz n'è betg cuntent cun la nova cunvegna da prestaziun cun Lai Marketing e Support SA. Il suveran ha refusà la cunvegna cun 53% da las vuschs. Quella avess muntà 350'000 francs dapli custs per la vischnanca, rapporta la FMR. Quai sper ils 3 milliuns cun la cunvegna actuala.
Cuira
Il parlament communal da Cuira ha ussa era substituziuns. Il suveran ha approvà cun passa 80% la revisiun parziala da la constituziun communala. Quai tar ina participaziun da bun 20%. Da nov pon parlamentarias e parlamentaris sa laschar substituir temporarmain tar absenzas senza perder lur mandat. Sumegliant al sistem dal Cussegl grond.
Trun
Trun ha reelegì ed elegì ses parlament. Per ils 15 sezs en il Cussegl da vischnanca da Trun avevan candidà 15 persunas. 10 da questas per in'ulteriura perioda d'uffizi e tschintg persunas novas. Sco quai che la vischnanca communitgescha, èn tuts vegnids elegids quai tar ina participaziun da bun 28%.
Glion
Glion na vul nagin dals dus projects solars ch'èn stads en votaziun oz. Quai communitgescha la vischnanca. Tant il project sin l'Alp da Schnaus sco era il project sin l'Alp da Rueun èn refusads mintgamai cun bun 1020 na encunter bun 600 gea. La participaziun è stada tar radund 47%.
Il project sin l'Alp da Schnaus avess producì forz'electrica per 4’400 chasadas sin ina surfatscha da 20 hectaras e quel sin l'Alp da Rueun avess cuvert 50 hectaras cun forz'electrica per 8'800 chasadas.
En la discussiun avant la votaziun han adversaris argumentà surtut cun la natira ed il maletg dals panels en la cuntrada.
Flem
Flem vul promover pli fitg emprimas abitaziuns. Cun 540 encunter 191 vuschs è approvada la revisiun da la planisaziun locala ed in decret per promover emprimas abitaziuns per persunas indigenas u era persunal che lavura a Flem. Tranter auter è nov era scumandà da construir segundas abitaziuns en edifizis protegids u caracteristics per il vitg.
Ultra da quai ha Flem approvà in credit da 6 milliuns francs senza tschains a la Flem Electric SA per la nova centrala Pultè.
Era approvà è la nova lescha per la protecziun da la populaziun en cas d’urgenza. La lescha regla las differentas incumbensas e responsabladads tranter il chantuns, la vischnanca ed auters partenaris en cas d'urgenza.
Tusaun
Tusaun ha ditg gea a la revisiun da la lescha da polizia da la vischnanca e quai cun 78% da las vuschs. La lescha da polizia nova prevesa tranter auter in scumond da fieus artifizials, in scumond per chauns sin las plazzas da giugar ed en santeris sco era registraziuns da video per garantir la segirezza e la protecziun. La participaziun a la votaziun è stada tar 23%.
Domat
Il suveran da Domat ha approvà il budget per l'onn che vegn cun 88% da las vuschs valaivlas. Il budget quinta cun in minus da bundant 360’000 francs tar entradas da var 41 milliuns francs. Plinavant han ils da Domat decis da laschar il pe da taglia tar 85%.