La secziun Rätia dal Club alpin svizzer prevesa da renovar la chamona da Carschina, sin il territori da Luzein. Quella vegn modernisada, e per porscher dapli confort als giasts vegn il dumber da plazs da durmir reducids.
La secziun Rätia quinta cun custs totals da var 2,6 milliuns francs. Sustegn dat la regenza grischuna cun conceder in emprest federal da 625’000 francs, en il rom da la Nova politica regiunala da la Confederaziun. Vitiers datti ina contribuziun chantunala da var 145’000 francs.
1,25 milliuns francs per il sport da massa
Las 40 organisaziuns che fan part da l’Associaziun grischuna da sport – survegnan contribuziuns pauschalas da total 1,25 milliuns francs. Las organisaziuns prestian ina lavur da basa impurtanta per promover il sport da massa e da prestaziun, communitgescha la regenza grischuna.
En la sessiun da l’october passà ha il Cussegl grond auzà la contribuziun pauschala annuala, dad 1 milliun ad 1,25 milliuns francs.
Per optimar las pistas al Corvatsch
En il rom da la Nova politica regiunala da la Confederaziun ha la Regenza concedì a la firma Alpin Infra SA ina contribuziun federala dad 1,45 milliuns francs per construir indrizs da far naiv al Corvatsch. Quest emprest è collià cun ina contribuziun chantunala equivalenta da var 243’000 francs.
Il project è budgetà cun custs totals da circa 4,25 milliuns francs. El sa cumpona dals projects parzials «runal Margun», «colliaziun Margun – La Chüdera», «Margun Surlej – Murtel» e «pista Cristins». Ils indrizs da far naiv planisads augmentian la garanzia da naiv al Corvatsch. E quai permettia d'optimar la purschida da pistas ennavadas en il territori da skis principal, hai num en la communicaziun.
![Blick über das Skigebiet Corvatsch im Oberengadin.](https://www.rtr.ch/static/cms/images/960w/f704f3.jpg)
Concessiun per ovra idraulica a Casti
La regenza grischuna ha approvà la concessiun dal dretg da las auas ed il project per l’ovra electrica Casti Vest. Cun renovar la concessiun ha l’Ovra electrica da la citad da Turitg ewz survegnì il dretg d’utilisar la forza idraulica fin l’onn 2050.
Cun novas pretensiuns per garantir las consegnas d’aua restanta dovri plinavant investiziuns da radund 2,6 milliuns francs – per realisar in’ovra electrica d’aua da dotaziun a la serra d’accumulaziun Burvagn. Uss sto anc la regenza da la citad da Turitg acceptar la concessiun.
![Blick aus der Vogelperspektive auf das Wasserkraftwerk Tiefencastel West.](https://www.rtr.ch/static/cms/images/960w/3d7ad2.jpg)