L'avantmezdi han las mattas furmà sis gruppas. En quellas han ellas elavurà ina proposta per il Cussegl grond. Sustegn per quai han ellas survegnì da «dretgas» deputadas e «dretgs» deputads. Per part han las mattas gia a chasa rimnà ideas e propostas.
La sala dal cussegl grond
Il suentermezdi è lura satda la debatta. La deputada Vera Stiffler ha declerà sco prim tge ch'ils nuvs tar mintga plazza fan. In « + » per dir gea, in « - » per dir na ed ina « 0 » per s'abstegnair da la vusch. Suenter ha cumenzà la part uffiziala. Da mintga gruppa declera ina matta tge ch'ellas vulan cuntanscher cun lur propostas. Ina gruppa vul sustegnair animals selvadis da rivar sur via vi. La segunda gruppa pretenda chastis pli dirs tar mobbing en scola. Plazzas da lavur parzialas per geniturs, sustegn per dunnas en la politica, meglra integraziun dad uffants immigrads e pli attractivas plazzas da giarsunadi en regiuns perifericas uschia ulteriuras propostas da tschellas gruppas.
La discussiun è en in tun fitg diplomatic, las mattas patratgan bain avant ch'ellas dian insatge. Era la manadra da la debatta Vera Stiffler conceda: «En congual cun las deputadas ed ils deputads discurran ellas en frasas bler pli curtas, ed anc bler pli libras. Per la paja discurran dapli persunas sco tar nus.»
In pau dapli lavur per il Cussegl grond
Cun excepziun dal tema per aminals selvadis èn tut las propostas vegnidas acceptadas. La vicepresidenta dal Cussegl grond, Tina Gartmann-Albin, ha cun grond plaschair surpiglià tschintg documents, simbolic per las tschintg propostas. Il Cussegl grond vegn a tractar quellas en ina da las proximas sessiuns.
Ord l'archiv
RR actualitad 12:00