«La marca grischun sa sto obliar dad esser persistenta», uschia statti sin la pagina da l'administraziun da la marca. Quai saja la premissa per sviluppar vinavant l'uschenumnada «metropola da natira» Grischun a moda onesta e credibla.
In pled da moda
La persistenza saja in pled da moda che vegn duvrà inflaziunar, di Dominique von Matt, expert da reclama e fundatur da l'agentura da reclama Jung von Matt en ses referat. Schi'ns vul evitar in «shitstorm», pia l'indignaziun culminada en la rait che po chaschunar in donn d'image, stoppia ins duvrar quel pled a moda credibla.
La communitad en la rait è uschè alerta e sensibla en la chaussa che persistenza pretendida vegn svelt demascrada.
En il Grischun na saja la credibladad dentant betg in grond problem, di Dominique von Matt. L'entira istorgia da communicaziun da la marca «grischun» saja marcada da credibiltad e da betg empermetter memia bler. Il Grischun saja transparent en sia communicaziun e conceda che la persistenza saja anc en elavuraziun e betg anc cuntanschida, lauda l'expert, ch'ha gidà a crear la campagna da «Gian e Giachen».
Prender posiziun politica
En connex cun temas sco la persistenza saja per affars dentant impurtant da sa posiziunar activamain politic. Quai di er la mainagestiun da l'interpresa da vestgadira da sport «Vaude» ch'ha preschentà en in segund referat la strategia persistenta da l'affar tudestgch. Er sch'ins possia perder a curta vista clientella haja ina tenuta politica sin lunga vista in effect positiv. Da quai è er Gieri Spescha, manader da la marca «grischun», conscient.
Ina posiziun clera en connex cun la persistenza è in punct central en il futur.
Part d'ina tenuta politica saja ch'in futur possia er dar sditgas a partenarias da la marca «grischun» sche quels na partian betg las valurs da persitenza da la marca «grischun». Enfin uss na saja quai dentan betg anc stà il cas.
Quatter champs d'acziun
La persistenza haja ina dimensiun ecologica, economica e sociala. Cun partenarias e partenaris che represchentan quellas dimensiuns ha la marca «grischun» elavurà quatter champs d'acziun en in lavuratori. Quels sa cumponan – formulà curt – da partir savida, crear finamiras liantas, controllar quellas e communitgar ils resultats. Actualmain vegnan quels champs anc planisads en detagl e duain vegnir realisads en collavuraziun cun concessiunarias e partenaris.